Ujuuki Boassen-ip ilinniakkamik naammassinninnermini allagartani Nuummi tiguaa, taamaakkaluartorli allaffimmi ikiortitut naammassinninnera suleqataasa ilaqutaasalu nalliuttorsiutigaat.
Borgmester Hermann Berthelsen-ip oqalugiarnermini ilaatigut oqaatigaa, suliffimmik misiliisorisimanera Qeqqata Kommuniata tulluusimaarutigigaa. Nutaanik sammisaqarusussuseqarpoq, piumassuseqarpoq, suliaminillu naammassinninnissaminik siunniussaqaraangami, ilungersuullugu naammassiniaasarluni. Ujuuki qitornaminut kisimi perorsaasuuvoq, taamaattumillu anguniagaqaraangami anguniakkani anguniartarlugu.
Borgmesterip aamma oqaatigaa, atuagarsornermik suliffimmillu misiliinertalimmik allaffimmi ikiortitut, teknikeritut, qarasaasialerisutut assigisaanillu ilinniakkaminnik nunatsinni naammassinnittartunut Qeqqata Kommuniata peqataanini tulluusimaarutigigaa.
Qeqqata Kommuniata Ujuuki pilluaqquaa, siunissamilu ajunnginnerpaamik kissaallugu.