Asasakka atualerlaat, ullormi atualeqqaarfissinni pilluaritsi. Angajoqqaat ilaqqutallu aamma pilluangaaritsi.
Ulloq qilanaarisimasarsi nalliutiinnaqaaq. Ullorlu pisanganartunik nuannersunillu imaqartussaavoq.
Atuarlernissi ilissinnut angajoqqaanullu qanoq isumaqassava?
Silarsuaq pissanganarluinnartoq ilissinnut ammarpoq. Nutaanik ikinngutitaartulissaasi nutaanillu sinaakkuteqalerlusi, siullertulli ukiuni qulini tulliuttuni oqaatsit, matematik kiisalu silarsuaq pillugu arlaqartunik ilikkagaqartussaavusi. Ullormi pinnguarusaarfimmit, ilinniartitsisunik atuaqatinillu tusarnaartussanngorpusi, ilinniakkerillusi kiisalu sunik ilikkagaqarsimanermik nammineq oqaluttuartalerlusi.
Sinaakkutit ilissinnut nutaani aamma piumasaqaateqassaaq, soorlu piffissaq eqqorlugu ullaakkut atuariartortarneq kiisalu atuarnermik paarsineq. Matumani ilaqutassinnik tapersersorneqarnissaq pingaarutilerujussuuvoq. Tamanna tunngavigalugu angajoqqaajususi ilaqutaasusilu meeqqassi atuarneranik tapersersuilluarnissannik qinnuigissavassi, meeqqammi atuarfimmit pissarsilluarnissaanut tapersersuinersi pingaaruteqarluinnartuuvoq.
Soorunami aamma siunissami pitsaanerpaamik periarfissaqarnissaq anguniarlugu, angajoqqaasi ilinniartitsisusilu tusarnaartarnissaat pingaaruteqarluinnarpoq.
Angajoqaajusunut, meeqqassi tapersersornissaannut annikittuinnarmilluunniit aamma iluaqutaasorujussuusarput. Meeqqassi innajaartittarnissaat isumagisarsiuk. Ullaakkut ulloq aallartilluartissiuk. Meeqqassi piffissaq eqqorlugu atuariartortarnissaanik ilinniartissiuk, taamaalilluni meeqqassi malugissavaa atuarfik ilissi ammma pingaartitarigissi. Piffissaq eqqorlu atuariartortarnissamut ileqquliussineq meeqqannut tunissutaavoq pitsaasoq, inuunermilu sinnerani ilinniarnermut sulinermullu atatillugu iluaqutigisassaraa.
Meeqqassi ullormut atuarfimmi sulerisimaneranik apersortaruk, ikinngutinut aaqqiagiinnginnerinullu tunngasut, atuartuunermut ilaaginnartut pillugit kiisalu ilikkarsimasai pillugit oqaluttuarnerani tusarnaaruk. Meeqqassi ilinniagaqalernerni ilinniakkerinermut atatillugu pitsaasunik sinaakkusiigit, assersuutigalugu pinnguaatinngortinneqarneratigut eqqissilluni inissaqarlunilu aallussisinnaaniassammat. Meeraq ilinniakkerisoq issiaqatigiuk imaluunniit qanittuaniigit, taamaalillutit meeraq qiimmassarsinnaallugulu tapersersorsinnaaniassagakku. Imaassinnaavoq piffissap ingerlanerani nalornisutut misigilertutit, meeqqalli atuarneranik soqutiginninnikkut tapersersuinikkullu ikiuulluartussaavutit. Meeqqassi ilinniartitsisussaannik suleqataalluarnissassinnik neriuuteqarpugut.
Naggataatigut ullormi atualeqqaarfissinnik pilluaqqorusuppassi, atuarluarnissassinnillu kissaallusi.