Sisimiuni Pitsaaliuinermut Siunnersortit, Miljøarbejderit imikkullu Nukappiaqqanut suliniuteqartut suleqatigiinnerisigut meeqqanut 20-35-nik amerlassuseqartunut angusaqarfiulluarpoq.
Meeqqat 7-14-nit akornanni ukiullit aasaanerani ornittakkaniinneq ajortut periarfissinneqarnikuupput kultureqarnermut takornariaqarnermullu tunngasumik sammisassaqarnissaat, kiisalu pinngortitaq misigisassarsiorfiginissaanut peqataatinneqarlutik.
Sapaatip akunnera siulleq kalattoorneq erinarsornerlu ilinniartitsissutigineqarput, ilitsersuisoralugit kalattoornermi Meeqqanut inuusuttunullu sullissisoq, Angerlarte Enoksen, erinarsornermilu nipilersornermik ilinniarfimmiit Jakob Froberg suleqataalu Laura Lennert Jensen. Meeqqat kalattoorlutik takornariat umiarsuaanni takutitsinikuupput, alutorineqarluarlutik nuannarineqarluarlutillu inequngineqaqaat; tamanna piviusunngorpoq takornariaqarnermut suliaqartoq, Ivik Ostermann Knudsen suleqatigineratigut, tassungalu qujavugut.
Julip ingerlanerani meeqqat silami sammisassaqartinneqarnerupput, soorlu qaqqanut majuarnerit, nunamiinnerit aammalu aalisariarnerannut angalatitseqatigiinnut Siriusimut qujassutissaqarpugut meeqqat puigunaatsorsimmata Julimilu misigisimasaminni nuannernersaata ilagimmassuk.
Tamanut qujanaq
Meeqqat ullaakkorsiornissaminnut nerisassaqartinneqartarput Tiggaliorfik J/Z tunissuteqartarneranut, qujaqaagullu. Brugsenimiillu naatitanut tunniunneqartartunut qujanarujussuaq, Pisiffimmiillu qallersuutissanik tunissuteqartarnermut qujanarujussuaq, kiisalu Namminersornerullutillu Oqartussat aningaasaliissutaannut qujanaq. Tunissuteqarnerit assorsuaq isumalerujussuupput.
Sisimiut Tusaataanut qujanaq pilerisaarummik saqqummiussisarnissinnut tunissuteqarnissigut.
Meeqqat nuannarilluagaat tallimanngornerit tamaasa nalunnguartarneq tamatumalu kingorna timersortarfeeqqami timimik atuineq periarfissaanikuummat suleqatitsinnut sunngiffimmi pisortaq, Fali Kleist aammalu timersornermut pinngortitamullu siunnersorti, Qillaq Banemannimut qujavugut.
Minnerunngitsumillu angajoqqaat meeqqaminnut peqataatitaqartut qujaffigerusuppagut meeqqatik pillugit suleqatigimmatigut, qaammatip ataatsip ingerlanerani meeqqap imminut unammillerneq misigineqarmat, tamarmillu annerusumik minnerusumilluunniit inuttut alloriaateqarnerat ersarimmat, neriullutalu ilinniarfigalugulu pissarsissutigilluarsimassagaat.
Naggataasumik meeqqat peqataasut qujaffigaavut , neriuppugullu 2017-mi peqataaqqikkumaartusi ☺