Kangerlussuarmi nutaamik umiarsualiveqalernermi takornariaqarnikkut iluaqutissat pillugit kiisalu Kangerlussuup siunissaa pillugu Kangerlussuarmi ataatsimoorussamik isumasioqatigiinnissamik pisariaqartitsisoqarneranik, Naalakkersuisut Qeqqata Kommunalbestyrelsillu isumaqatigiinnerat, borgmester Hermann Berthelsenimit nuannaarutigineqarpoq.
Ukiup tulliani aningaasanut inatsisissaq pillugu politikkikkut isumaqatigiissusiornissami, Naalakkersuisut suliniut ilanngunniarmagu aamma borgmesterip nuannaarutigaa. Naalakkersuisuni siulittaasoq ilumoorpoq, Kangerlussuarmi umiarsualivik 2017-imi Aningaasanut inatsimmut ilanngunneqarnissaanut 100 procentimik Naalakkersuisut neriorsuisinnaanngitsut, Inatsisartummi taakkuupput aningaasanut inatsimmik akuersisartuullutillu aalajangiisartut (2016-imi aggustip 25-ani kommunip nutaarsiassatigut nalunaarutaanut, Naalakkersuisut siulittaasuata 2016-imi aggustip 30-ani erseqqissaanera takuuk).
Sisimiut-Kangerlussuaq-mut sanaartornissamut aningaasaliissutissatut amigaatigineqartut pillugit, Naalakkersuisut aaqqiissuteqarniarlutik sumiiffimmi kommunimik isumaqatigiissutaanik, Naalakkersuisut 2017-imu Aningaasanut inatsimmut allannguinissamut siunnersuutaanik Inatsisartut tapersersuinnginnissaat takorlooruminaatsippara, taama Hermann Berthelsen oqarpoq.
Illoqarfiit annersaasa aappaanut nunaqarfittaanullu sanaartornermut aningaasaliissutit 1,4 mio kr kisimik immikkoortinneqarput, illoqarfiilli annersaanut nunaqarfiinullu qanittuinut 209,8 mio. kr. immikkoortinneqarlutik. 2017-imut Aningaasanut inatsisissatut siunnersuummi taamatut equngatitsinerujussuaq Naalakkersuisunit Inatsisartuniillu iluarsiivigineqartariaqarpoq. Tamannalu pillugu Naalakkersuisut Qeqqata Kommunalbestyrelsillu 2016-imi aggustip 18-iani ataatsimiinnerminni isumaqatigiissutigaat, tamatumani Sisimiut-Kangerlussuaq-mut ilaatigut Kangerlussuarmi nutaamik umiarsualiviliortoqarnissaa aaqqiissutissaasoq.
Kommune Kujalleq-mut kiisalu Qaasuitsup Kommunianut qanoq aaqqissuteqartoqassanersoq namminneq paasiniartariaqassavaat, maluginiakkamali ilagaattaaq, illoqarfinni kommuninilu taakkunani 2017-imut Aningaasanut inatsisissatut siunnersuummi sanaartornermut aningaasaliissutit annikittuararsuusut, taama Qeqqata Kommuniani borgmesteri naggasiivoq.