Kim Kielsen, Vittus Qujaukitsoq aamma Knud Kristiansen sinniisoralugit Naalakkersuisut Qeqqata Kommuniani kommunalbestyrelsimik, 2016-imi sisamanngornermi aggustip 18-iani ataatsimeeqateqarput, tassanilu Aningaasanut Inatsit, attaveqaqatigiinneq, Kangerlussuup siunissaa, Kangerlussuarmilu umiarsualivissaq nutaaq eqqartorneqarlutik.
Kalaallit Nunaanni attaveqaqatigiinneq ineriartortinneqartariaqartoq illuatungeriit isumaqatigiissutigaat. Kommunini allani pingasuni mittarfeqarnikkut pilersaarutit Naalakkersuisut paasissutissiissutigaat. Sisimiuni talittarfimmut, Kangerlussuarmilu ikaartarfimmut Qeqqata Kommunia nammineq aningaasalersuisariaqarsimalluni, Namminersorlutik Oqartussat Qeqqata Kommunianut attaveqaatitigut suliniuteqannginnerat Qeqqata Kommuniani kommunalbestyrelsip uparuarpaa.
Ukiut siulii assigalugit, sanaartornissamummi aningaasaliissutit 71 procentii kommunimut ataatsimut immikkoortinneqarlutik 2017-imut Aningaasanut Inatsisissatut siunnersuut annertuumik nikingassuteqarnera, Qeqqata Kommuniani kommunalbestyrelsip erseqqissaatigaa. Taamaattumik illuatungeriit isumaqatigiissutigaat, naligiinngissuseq annikillisinniarlugu kommunini pingasuni sanaartornissamik suliniutit piviusut pisariaqartinneqartut.
Kangerlussuarmi umiarsualivik piaartumik sanaartorneqartariaqartoq, umiarsualiviliornissamullu Naalakkersuisut 2017-imut Aningaasanut Inatsisitigut Qeqqata Kommunianut 50 mio. koruuninik aningaasaliissuteqassasut illuatungeriit isumaqatigiissutigaat. Kangerlussuarmi mittarfik matuneqassanngitsoq, Kangerlussuarmilu periarfissarpassuit pillugit illuatungeriit ukioq naatinnagu isumasioqatigiissasut illuatungeriit aamma isumaqatigiissutigaat.
Ilaatigut Naalakkersuisut siulittaasuata 2015-imi ukiortaami oqalugiaateqarnermigut kiisalu umiarsualiviit takornariaqarnerlu pillugit Namminersorlutik Oqartussat pilersaarutimikkut Kangerlussuarmi umiarsualiviup sanaartorneqarnissaa pillugu nalunaarutiminnik attassiinnarnerinut Qeqqata Kommuniani kommunalbestyrelsip naalakkersuisut nersualaarpaat. Nuna tamarmi siuarsarneqarnissaa, Namminersorlutik Oqartussallu siuttunngorlutik aqqutissiuinissaat pingaaruteqarpoq, taama Qeqqata Kommuniani kommunalbestyrelsi naggasiivoq.