Otto Kielsen, Akku Qaqortormi 1991-mi 13. Marts qatserisartunngorpoq, ukiunilu 25-ni qatserisartuusimanerani Dronning Margrethe aappaata nersornaasiuttagaanik nersornaaserneqarpoq. Akku Sisimiuni qatserisartunngorpoq 2015-imi.
Siverth Poulsen 2006-mi 16. November qatserisartunngorpoq, taamaasillunilu ukiuni qulinngortorsiorluni.
Upalungaarsimanermut ikiorti Karl Berthelsen ulloq taannattaaq 2006-mi qatserisartunngorpoq taamaattumillu aamma ukiuni qulini qatserisartuusimanerminut nersorneqarluni.
Uku qatserisartut pingasut pikkorissuupput, tatiginartuullutik uummatimikkullu qatserisartuullutik. Qatserisartuuneq suliffiinnaanngilaq inuusaasiullunili. Kikkut tamarmik illumik ikuallattumik qimaagaangata qimaaffiatigut iserlutik qatseriartortarput, ilaatiguttaama oqarpoq Upalungaarsimanermut pisortaq Ole Kreutzmann.
Borgmester Hermann Berthelsen aamma ukiorpassuarni qatserisartuusimasunut qujaniarpoq, puigoqqunngilaali aamma aappaasut qatserisartunut tunuliaqutaasartut angerlarsimaffimmillu ingerlatsisuusartut qatserisartutut suliartoraangata.