Ilinniartitsisut naammagisimaarinnittut meeqqallu sumi tamaani nuannaartut.
Sarfannguani atuarfiup ilassutissaata ammaanersiornerani tamakku takusassaapput.
Atuarfik nutaassaq sivisuumik ingerlanneqarsimavoq. 2010-mili innutaasut atuarfimmik anginerusumik kissaateqartarsimapput, atuarfik nutaanngitsoq mikivallaalersimammat, nutaannginnertaalu aamma oqoqalersimammat iluarsartuunneqartariaqalersimalluni. Taamanikkut atuarfik 30-inik atuartoqarpoq inissakilliornerlu piusimalluni.
Illu nutaaq angilluni qaamavoq, maannakkullu atuartunut 17-inut, ilinniartitsisunut sisamanut sulisunullu marlunnut inissaqangaatsiarluni. Init atuartitsiviit angisuut arfiniliupput, atuakkanik atorniartarfik, sannavik, igaffik uffarfillu. Tamakku tamarmik atuarfinnut nutaaliaanerusunut ilaapput, taamaalillunilu Atuarfitsialaap anguniagaanut naleqqunnerullutik.
Nuuttaqattaartueruppoq
Ammaanersiorneq aallartillugu atuartuaqqat ’Qaloorfiup Nuua’ atorlugu erinarsorput, tamanna pereermat Qeqqata Kommuniani borgmesteri Malik Berthelsen oqalugiarpoq, tassanilu atuarfiup isikkiviginnersua nersualaarlugu meeqqallu atuarnerminnik paarsilluarnissaannik, atuarfimmillu paarsilluarnissaannik kaammattuilluni.
Ilinniartitaanermut pisortaq tunissuteqarpoq, kinguneranik nunaqarfimmi aqutsisoq atuarfiup pisortaa peqatigalugu oqalugiarlutik. Nerriviit nerisassanik kaaginillu ulikkaartut. Aalisakkat meeqqat namminneq pisarisaat kaagillu illinnarluinnartut.
- Atuarfittaarput nuannareqaarput. Nutaajunerata atortorissaarutitigullu nutaaliaanerata saniatigut, oqoqalersimaneq patsisaalluni nuttaqattaarneq piunnaassammat iluarusunnarpoq, atuarfimmi aqutsisoq Anna Lise Kreutzmann oqarpoq.
2015-imi suliaq aallartippoq, 2016-imilu atuarfik naammassereersimasussaagaluartoq, suliap ingerlanerani titartagartaata allanngortinneqarnissaa patsisaalluni kinguartinneqartariaqarsimalluni.