Piniarnermut atatillugu qamuteralannik kiisalu ATV-nik immikkoortuni aalajangersimasuni, ingerlavinni aalajangersimasuni atuisinnaaneq kiisalu piniartunut tammajuitsussarsititsiniarlunilu piniartitsisartunut taamaallaat atuuttoq, Piniartunit, tammajuitsussarsititsiniarluni piniartitsisartunit, sunngiffimmi piniartunit kiisalu innuttaasut sinnerinit ilisimaneqarpoq. Taakkuli aamma piniarfiusinnaasunut tamanut angalaaqqusaanngillat.
Sumiiffiit ilaani piniarnermut atatillugu qamutinik motoorilinnik angalanissaq inerteqqutaavoq. Ingerlavinni angallaffiusinnaasuni piniartut qamutitik motoorillit inisseriarlugit, piniartigatik minnerpaamik 500 miiterimik qamutit qimaqqaarlugit piniarsinnaapput.
Piniarnermut atatillugu unioqqutitsilluni qamutinik motoorilinnik angalasoqartarneranik piniartunit innuttaasuniillu allanit arlalitsigut naammagittaalliortoqartarpoq. Piniarnermut nakkutilliisut arlaleriarlutik piniarnermi unioqqutitsillutik angallattunik naammattoorsisarput, tamakkulu nalunaarsorneqartarlutik.
Piniarnermut atatillugu angallannermut malittarisassat atuutinnissaanut ajoraluartumik ajornartorsiuteqartoqartoq, Qeqqata Kommunianit paasineqarpoq. Taamatullu allatigut unioqqutitsilluni angallannernut malittarisassanik atuutitsiniarnermi taamaalluni.
Piniarnermut atatillugu unioqqutitsilluni angallanneq takuneqaraangat, tulliuttutigut iliuuseqartoqartarpoq:
- Piniarnermut nakkutilliisoq imaluunniit innuttaasoq piniarnermut atatillugu unioqqutitsilluni angallannermik naammattoorsippat. Piniarnermut nakkutilliisoq/innuttaasoq assiliinikkut, nummerplade-sa kiisalu aquttup aqqa nalunaarsorneratigut uppernarsaasiussaaq.
- Sumiiffimmi politiinut unioqqutitsineq nalunaarutigineqassaaq. Uppernarsaatit politiinut tunniunneqassapput.
- Sumiiffimmi politiit suliamik misissuissapput. Kina aquttuusimanersoq paasiniassavaat imaluunniit kinaasimaneranik ilisimaneqarpat, aquttoq attavigineqassaaq. Aquttoq unioqqutitsisimanermik nassuersinnaavoq. Suliap ingerlateqqinneqarnissaanut Politimestereqarfimmut nassiunneqassaaq. Taamaalillutik sumiiffimmi politiit suliassaminnik naammassinnissapput.
- Politimestereqarfiup Aalisarnermut Piniarnermullu Naalakkersuisoqarfik peqatigalugu suliaq eqqartorneqassaaq. Unioqqutitsinerup qanoq sakkortutigisimaneranik kiisalu pineqaatissiissut suna naapertuunnersoq, Naalakkersuisoqarfimmit nalilerneqassaaq. Suliap ingerlateqqinneqarnissaanut naliliineq tunngaviliisuussaaq.
- Taamaalilluni Politimestereqarfiup unioqqutitsineq eqqartuussivikkut ingerlateqqinneqarnissaa isumagissavaa, pineqaatissiisoqarnissaa pillugu. Sulialli annertuumik amerliartuinnartuupput. Taamaalillutik nakuusernermik, toqutsinermik meeqqanillu atornerluinermik suliassat pingaarnersiorneqartarlutik. Tamatuma ilaatigut kingunerisarpaa, unioqqutitsilluni angallannermi piniarnermilu suliassat suliarineqartannginnerat. Pineqaatissiisoqarneq ajorpoq. Tamanna tunngavigalugu angallannermut piniarnermullu malittarisassanik atuutsitsiniarneq ajornarsilluni.
Ajornartorsiutip aaqqiivigineqarnissaa siunertaralugu, Aalisarnermut Piniarnermullu Naalakkersuisoqarfimmut Qeqqata Kommuniani borgmesterimit attavigineqarput. Naalakkersuisoqarfiup aaqqiissuteqarnissamut siunnersuutaa utaqqineqarpoq.