Qeqqata Kommuniani Sullissivimmi sapaatip akunnerini marluusuni allaffimmi ikiortitut suliffimmik misiliinermi, ilisimasanik nutaanik pissarsiffiulluarpoq.
Tamanna 15-inik ukiullip Ane-Christine Siegstad-ip, Minngortunnguup Atuarfiani atuartp uppernarsarsinnaavaa.
Oktobarimi sapaatip akunnerini marlunni Qeqqata Kommuniata Sullissiviani suliffimmik misiliivoq.
Allakkanik nassiussassanik immikkoortiterineq poortuinerlu, allakkanik nalunaarsuineq, nuuttunik nalunaarsuineq, ataataassutsimut uppernarsaanerit, minnerunngitsumillu innuttaasunik sullissineq Ane-Christine-p ilinniarpai.
Allaffimmi ikiortitut sulilluni misiliisinnaasimanini nuannarisorujuussuuaa.
- Nuanneqaaq. Periarfissat amerlangaarmata siunissami sunngussanerlunga suli naluara. Kisianni allaffimmi ikiortitut sulissallunga takorloorsinnaavara, taamaattuminguna tamanna misilinniarlugu aalajangernikuusunga, taama Ane-Christine oqarpoq nangillunilu, anaanani allaffimmi ikiortitut ilinniarsimasuusoq.
Suliffeqarfinni misiliinerit allanngorartut
Ane-Christine-p 'suleqatigisimasani' nuannarai, tikilluaqqusaasutullu misigisimalluni. Ullormut suliassat apeqqutaatillugit assigiinngitsunik suliakkerneqartarpoq.
Ullut ilaanni ulapaarnerusarput, ullulli ilaanni aamma suliassaqarpallaarneq ajorlutik.
- Ukioq kingulleq Brugseni-mi suliffimmik misiliivunga, allarluinnaavorlu. Taamaattumik suliffeqarfinni assigiinngitsuni atuartut suliffimmik misiliisinnaanerinik neqeroorfigineqartarmata iluarpoq. Taamaalilluni suliffeqarfiit ataasiakkaat suliffigalugit qanoq innersut, nalinginnaasumillu sunik suliaqartarnersut misilittagaqarfigineqalersarput. Tamanna iluarpoq, misilittagaqalersarpugummi, siunissamilu ilinniakkamik toqqaanissamut iluaqutaasinnaalluni, taama Ane-Christine naggasiivoq.