Pisortaqatigiit Ukiumi suleqatitsialammik toqqaanissaminnut toqqammavissanik sisamanik aallaaveqartarput, tassaallutik:
* Suliffimmi pitsaasumik atugassaqartitsineq
* Ataqatigiissitsisinnaassuseq
* Ikiuisinnaassuseq kajumissaarisinnaassuserlu
* Aalajaatsumik suleqataassusilik
Ukioq manna qitiusumik allaffeqarfimmi suleqatitsialanngorpoq: Atuilluartuunissamut siunnersorti Kristina Würtz Poulsen Sisimiuniit.
Kristina Würtz Poulsen kommunimi ukioq ataaseq sinnilaarlugu sulisimavoq, piffissallu taassuma iluani angusarpassuaqarluni. Suliniutit aallartissimasaasa ilagaat allaffeqarfimmi sulisunut pingasunngornerit tamaasa eqaarsaartitsisarneq. Tamatuma saniatigut ullormut peqqissuunissamik aaqqissuussisimavoq, tassa CSR suleqatigalugu inuummarissaasussanik kommunimit tamanit peqataaffigineqartumik pikkorissaatitsisimalluni. Kristina suleqat pikkorissuuvoq, aalajaatsoq sullarissorlu. Saaffikkuminartuujuaannarpoq suleqatiminillu ikiuinissaminut piareersimajuaannarluni.
Kommunip suliffeqarfiutaanit suleqatitsialanngortoq tassaavoq: Pinaveersaartitsinermut siunnersorti Albricht Kreutzmann (Upak) Maniitsumi ilaqutariinnut inerisaavimmiit.
Albricht Kreutzmann ilaatigut Maniitsumi, Sisimiuni nunaqarfinnilu Hash-i naaggaarpara-mut paasititsiniaanermi ataqatigiissaarisutut suleqataalluarsimanerminik takutitsilluarsimavoq. Taassumalu saniatigut Maniitsumi, Sisimiuni nunaqarfinnilu suliffeqarfinni assigiinngitsuni tatitussutsimut tunngasunik annertunngitsumik pikkorissaasarsimalluni. Albricht suleqatissarsiullaqqissuuvoq, pinaveersaartitsinermullu tunngasut iluanni anguniagassanik pilersitsisoqaraangat anguneqarnissaat sulissutigisarlugu.