Taannarpiaq pissutigalugu qinngasaaruttarneq, ingutsisarneq nakkarsaasarnillu pillugit oqallinnissamut innuttaasut atuartullu angajoqqaavi aggersarneqarsimapput.
Iliuusissatut pilersaarutaasoq tassaavoq siusissukkut iliuuseqarnissaq, ilaatigullu naqissuserneqarpoq, meeqqeriviit atuarfiillu akornanni suleqatigiinneq pitsanngorsartariaqartoq.
- Ajornartorsiutaasoq qaangerniarlugu suleqatigiittariaqartugut, takkuttut tamarmik isumaqatigiipput. Innuttaasut, angajoqqat ilinniartitsisullu Oqallissaarisut ilaat Helga Nielsen, Qeqqata Kommuniani suliniutinut siunnersortiusoq oqarpoq, suliniut meeqqerivimmili aallartinneqareersimassasoq.
Taassuma meeqqat atuarfii suleqatigalugit unnuk immikkuullarissoq aaqqissuunnikuuvaa, angajoqqaallu immikkut qaaqqusaasimasut maqaasineqaraluartut, unnuk ingerlalluarpoq.
- Oqallinneq pitsaavoq, ajornartorsiut una qaanngerneqartariaqartoq malugineqarsinnaavoq. Meeqqat qinngasaarneqaraangamik ingerlalluarnissaannut sunniuttarpoq. Angajoqqaat ilaat oqaluttuarpoq, nammineq meeraanermini qinngasaarneqartarsimalluni, namminerlu meeqqani qinngasaarneqartarnerinut isiginnittuulluni assut annernartuusoq. Taakkumi anniaataat misigisinnaavaa, Helga oqaluttuarpoq.
Aserorsaataasumik kingunissat
Sammineqartut ilagivaat, qinngasaarinermi qanoq qisuariartoqartarnersoq, qisuariaatsit assigiinngitsut, isumakkeerinninneq, imminut isigineq allarpassuillu.
- Qinngasaarineq sakkortuujuvoq. Imminut toqunnissamut eqqarsalersitsisinnaavoq, nikallungalertoqarsinnaalluni, tatiginnikkunnaartoqarsinnaavoq, atornerluisunngortoqarluniluunniit. Arlaannik immaqa ajunngippallaanngitsumik takusaqarutta, sukkanerusumik ikiuunnissatsinnut saaffiginninnissatsinnullu pikkorinnerulernissarput pingaarutilerujussuuvoq, Helga oqarpoq.
Unnuk naggaserneqarpoq, takkuttut nammineq kajumissusertik atorlugu suleqatigiissitaliornerannik, suliniutinik assigiinngitsunik soorlu oqalugiarnernik oqallitsitsinernillu assigiinngitsunik suliaqartarnermik siunertaqartussanik. Aammattaaq pitsaaliuinermi siunnersortit suleqatigalugit kaammattorsaqatigiinnik suliaqartoqassaaq.
- Innuttaasut qanoq iliornissamik namminneq suliniuteqarnerat isumalluarnarpoq, kivitseqatigiikkuttami angusaqarnerusinnaavugut, Helga naggasiivoq.