Inuussutissarsiutit takornariaqarnerlu pillugit Inuussutissarsiornermut Nukissiuuteqarnermullu Naalakkersuisoq Aqqalu Jeremiassen sapaatip akunnerata naanerani isumasioqatigiissitsivoq, ataasinngormallu attaveqaqatigiinneq pillugu Ineqarnermut Attaveqarnermullu Naalakkersuisoq Simon Simonsen isumasioqatigiissitsilluni.
Inuussutissarsiutit takornariaqarnerlu pillugit Inuussutissarsiornermut Nukissiuuteqarnermullu Naalakkersuisup oqaluttuaraa, Qeqqata Kommuniani takornarialerisut 136 mio. koruuninik kaaviiaartitaqartut, ukiorlu naammatsillugu atorfiit 246-t nalinginut atorfinitsitsisimasut. Arctic Circle Business-ip paasissutissiissutigaa, takornarissat pillugit Visit Greenland-imit aamma Kalaallit Nunaanni Naatsorsueqqissaartarfimmiit kisitsisit naapertorlugit, nunap immikkoortortaani takornariartartut 75 procentit missarisaat Kangerlussuarmeertartut. Taamaalilluni Kangerlussuarmi takornarialerinermi 100 mio. koruunit sinnerlugit kaaviiaartinneqartarput, 180-inullu atorfeqartitsilluni. "Takornariaqarneq Qeqqata Kommunianut, Kalaallit Nunaannullu qanoq pingaaruteqartiginersoq kikkunnut tamanut ersarinnerulerpoq", Malik Berthelsen oqarpoq.
Kangerlussuarmi takornarialerinerup kommunip sinneranut suli pitsaanerusumik ataqatigiissinneqarnissaa pillugu peqataasut ikigisassaanngitsunik siunnersuuteqarput. Ungasinngitsumi UNESCO-p allattorsimaffianut ilanngutsinneqarneq kiisalu Sarfannguit aqqusaarlugit Kangerlussuarmit Sisimiunut attaveqalernissaq arlallit immikkut sammivaat. Maniitsumi arfernut katersugaasivissaq qitiusumik aamma eqqartorneqarpoq, Namminersorlutik Oqartussallu takornariaqarneq pillugu pilersaarutissaannut atugassianngorlugu peqataasut Aqqalu Jeremiassen-imut tunniullugu.
Attaveqaqatigiinneq pillugu isumasioqatigiinnermi Ineqarnermut Attaveqarnermullu Naalakkersuisup mittarfinnut pilersaarut, angallannerullu aaqqissuussaanerata pitsanngorsartariaqarnera pillugit paasissutissiivoq. Kangerlussuaq atorunnaarsinneqassagaluarpat, nunap immikkoortortaanut kingunipiluutissat Air Greenland-ip oqaluttuarai. Kangerlussuaq takornariaarutissaaq, Sisimiunullu timmisartumik angalaneq sivisuninngorlunilu akisunerulissaaq. Maniitsoq massakkut sapaatip akunneranut sisamariarluni timmisartunik tikinneqartartoq, sapaatip akunneranut marloriaannarluni tikinneqartalissaaq, qularnanngitsumillu Paamiut peqatigalugit sullissinissamik isumaqatigiissutinut ilanngunneqarluni. Tamanit nuannaarutaasumik Simon Simonsen-ip Kangerlussuup siunissaa tapersersorpaa. Simon Simonsen-ip ersarissumik Kangerlussuarmik tapersersuineranut, Kangerlussuullu siunissaa pillugu Kangerlussuarmi innuttaasunik nunaqarfimmilu aqutsisunik ataatsimeeqateqarnissaminik pilersaaruteqarneranut Malik Berthelsen-ip nersualaarpaa.
Isumasioqatigiinnerni taakkunani marluusuni Qeqqata Kommuniani borgmesterip timersuutinik aallutaqarluartup erseqqissaatigaa, ”Kangerlussuaq aqqusinerpassuaqarnermigut, pinngortitamullu aqqutigissaarnermigut kiisalu misigisassarsiorfissatut neqerooruterpassuaqarnermigut Kalaallit Nunaanni ”Club La Santa”-nngoriartorsinnaasoq. Inuussutissarsiutit takornariaqarnerlu kiisalu attaveqaqatigiinneq pillugu ineriartortitsinissaq pillugu Naalakkersuisunut ilaasortat taakku marluk kommunitsinnukarlutik inuussutissarsiutilinnik kommunimillu oqaloqatiginnikkiartornerinut nersualaarusuppakka, Malik Berthelsen naggasiivoq.