Juulli nuannersuullunilu killitsinartarpoq. Juullerpalaartut qullersuarnut nivinngarneqartalernerisigut Sisimiut illoqarfiata qiterpasissortaa ukiut tamaasa juullerpalaarnerusalissaaq. Sarfalerisut ApS-imit Maannguaq Philip Lauritzen, suliniummik aallartitsisuuvoq.
- Qaqortormiuuvunga, Qaqortumilu juulleriartornerani qullernik juullerpalaartunik nivinngaasoqartarpoq, ilinniartuunermalu nalaani taqqavani ikkussueqataanikuullunga. Nuannertaqaaq. Maani illoqarfimmi innaallagisserisutut aallartikkamali Qaqortumi iliuuserineqartartup assipalua maqaasisarpara. Juulleriartornerani illoqarfik amigaateqartuusisarpoq. Taamaattumik isumassarsiaq una piffissap sivisuup ingerlanerani pinngoriartorpoq, Maannguaq oqaluttuarpoq.
Illoqarfimmi juullerpalaartunik nivinngaanissami periarfissat ujartorlugit aallartissimavoq. Minnerni aallartissimavoq. Siullermik Qeqqata Kommunia attavigisimavaa. Sunaaffa kommuni aamma taamatulli eqqarsaatersuuteqarsimasoq, suliniullu pitsaasoq tapersersorusullugu.
- Ualip ingerlanerani pisiniarfiit suliffeqarfiillu suliniummut peqataatilerpakka, taamak Aqqusinersuaq sinerlugu pisiniarfinnut suliffeqarfinnullu iserluni isumassarsiaq pillugu oqaluttuarlunilu tapersersuerusunnersullu pillugit apersuisimasoq Maannguaq oqarpoq.
Juullerpalaartut Karl Sivertsenip aqqusernani nivinngartorusussimagaluarpai, Nukissiorfinnili pisortamit Jan Zachariassen-imit siunnersorneqarnermigut, juullerpalaartullu 29-t tikimmatigit, Aqqusinersuaq sinerlugu nivinngartorneqartussanngorput, Maannguaq oqaluttuarpoq.
Suleqatigiittoqartariaqarpoq
Suliniarneq ingerlalluarsimavoq.
-Aperisakka tamarmik nangaassuteqaratik isumaqataapput. Nuannaartitsinissamik nuannersumillu avatangiiseqartitsinissamut ataatsimoorussamik anguniakkamut kikkut tamarmik suleqataapput, taamak tapersersorluarneqarsimalluni qujamasuttoq Maannguaq oqarpoq. Nangippoq;
-Unammillertitsinnit ikioqqullunga nalinginnaasumik sianerfigineq ajorpakka, matumanili juullerpalaartut nivinngaassornissaanni Kaataq El ikiorsinnaaneraatigut aperivara. Qujanartumik ikiorusuppaatigut, Maannguaq qungujulluni oqarpoq.
Apersorneqarnermini Maannguaq sianerfigitippoq. Sunaaffa juullerpalaartut Danmark-imit timmisartukkut nassiunneqartut pillugit Blue Water ilisimatitisiniarluni sianertoq.
Maanna suna tamarmi inissippoq. Maannguaq nuannaarpoq.
-Suna tamarmik sukkasuumik ingerlavoq, taamaattumillu juullerpalaartut ukioq manna killeqarlutik orpiit ullorissallu kisimik nivinngaassorneqassallutik. Suliniut una annertusineqassappat, juullerpalaartunillu assigiinnginnerusunik toqqartuisinnaaniassagatta, neriuppugut aappaagu siusissukkut aallartissinnaassalluta, Maannguaq oqaluttuarpoq. Aqquserngit amerlanerusut juullerpalaartunik pinnersarneqarsinnaaniassammata, neriuppoq aappaagu amerlanerusut tapersiiumaartut.
- Ikiuuttut tamaasa qutsavigaakka. Neriuppunga juullerpalaartut innuttaasunut nuannaarutissiillutillu juullerpalaarnerusumik misigititsissasut. Pisiniarfiit tunissuteqarsimasut tamaasa sinnerlugit juullisiorluarnissassinnik kissaappassi. Naggasiivoq.
Decembarip aallaqqaataa tikitsinnagu juullerpalaartut nivinngaassorneqassapput, sapaassuarmilu siullermi decembarip aappaani ikinneqarlutik.
Suliffeqarfiit tulliuttut suliniummut tapersersuipput:
Juullerpaluttunik:
- Pisiffik, tallimanik
- Brugseni, tallimanik
- Qeqqata Kommunia, tallimanik
- Grønlandsbanken, pingasunik
- JS Tiggaliorfik, marlunnik
- Lions Club, marlunnik
- Tamalaat Aps, marlunnik
- Revisoren i Sisimiut Aps, marlunnik
- Polarmagasinet, ataatsimik
- Butik Inuk Aps, ataatsimik
- Kujataani Isarussat, ataatsimik
- Sirius Greenland ApS, sisamanik
- Hotel Sisimiut, sisamanik
- Brøndum, marlunnik
- B.J Entreprise, juullerpalaartunik ikkussuinissamut lastbiilinik, qaqitsissutissamillu tapersiipput
- Blue Water, nassiunneqarnerinut tapersiipput
- Nukissiorfiit, innaallagissamik tapersiipput
- Sarfalerisut Aps, ikkussuinissamut atortussanillu tapersiipput
- Kaataq El, ikkussuinissamut sarfalerisunik sulisitsinissamigut tapersiivoq
- Amerloq Byg Aps, lift-imik atugassiinermigut tapersiivoq
- Tele-Post, nassiunneqarnissaannut 5.000 koruuninik tapersiivoq
- Radio Tusaataat, tusaataatigut aallakaatsitsinissamigut tapersiivoq
- VVS Service beslaginik tapersiivoq
Maannguaq Philip Lauritzen illoqarfimmi pinnersaatinut piviusunngortitsisuuvoq