Nunaqarfinni atuartut tuluttut piginnaasaat qaffassarniarlugit Qeqqata Kommuniata The Granny Cloud (internetstimi aanaakkut, aaqq.) atulernikuuvaa.
Qeqqata Kommuniani tuluttoorneq 1. klassimi aallartinneqartarpoq, kisianni tuluttoornermut ilinniartitsisunik amigaateqakkajuttarmat, Qeqqata Kommuniata nunaqarfiini The Granny Cloud ilinniartitsinermi periutsit ilaattut atuutilersinneqarnikuuvoq. iPad-imik suliniummi ungasiaanit atuartitsineq anguniakkat ilagilluinnarpaat, taamaammat ilanngunneqarnissaa ajornarsimanngilaq.
The Granny Cloud Atammimmi aallartinneqarpoq, maannalu Qeqqata Kommuniani nunaqarfinnut arlalinnut siaruarneqarnikuulluni, ilaatigullu Napasumi atorluarneqarluni.
Tallimanngormat Sarfannguani aallartinneqarpoq, tassani 4. klassimiit qummut atuartut aqqanillit, Canadamit USA-milluunniit ilinniartitsisoqarlutik akunnerup affaani tuluttut oqalupput. Ilinniartitsisuusinnaapput, kisianni nunarsuup sinneraniit allaanerujussuarmik tunuliaqutaqarsinnaapput. Taakku ataatsimut siunertarivaat, meeqqanik suliaqarnissamik nuannarisaqarluarnertik.
Alloriarfinni misilitsinnerit qaffasinnersaat
Meeqqanut ilinniarnissamik killilimmik nukissalinnut nammineq kajumissutsiminnik tuluttoornermut ilinniartitsinermik The Granny Cloud kattuffiuvoq, Indiamiillu ataqatigiissaarneqartartuulluni.
Nunaqarfinnit assigiinngitsuneersut atuartut The Cranny Cloud iluaqutigereerpaat, tuluttut oqaasilinnit tuluttut oqalunnissamut `pinngitsaalisaasaramik`. The Granny Cloud aamma iluaqutaanini takutereerpaa.
Napasumimi alloriarfinnut misilitsinnerit 2018-imi Qeqqata Kommuniani qaffasinnerpaapput.
Maani atuartut aamma iluaqutigiumaaraat neriuutigaarput, maannakkummi tuluttut oqalunnerusoqalerpoq, Sarfannguani atuarfiup pisortaa Anna Lise Kreutzmann oqarpoq.