Qinnguata Atuarfiani 8. - 10. klassimi atuartut sisamat pikkorilluinnartut, unammisitsinermi peqatigiillutik ajugaapput. Unammisitsinermi eqqugassaalluni, pingaarnertut unammiuaaqatigiinnermut, Aalborg-imi ingerlanneqartussamut peqataajartorneq. Qinnguata Atuarfianiit Lola Gundersen aamma Camilla Lomholt nerisassanik atuilluarnissamut app-imik suliniuteqarlutik kiisalu Matti Vængtoft aamma Ingo Johansen oqarasuaammik angallattakkamik atuilluarnerusumik, atortui taarsersorsinnaallutik kiisalu puua pinngortitamit piusuusumit plastikkimik suliniuteqarlutik ajugaapput.
Opfinderkonkurrencen Projekt Edison 2018 nuna tamakkerlugu nassaassarsiornermik unammisitsineruvoq, tassani atuartut nutaaliornissamut ilikkariartornermut peqataanissamut periarfissinnissaat kiisalu sanaartornissamut nutaaliornissamullu soqutigisaqalersinnissaat siunertaalluni. Suliat akimorlugit ilinniartitsinerit ingerlanneqarput, atuartullu namminersorlutik nutaaliornernik suliaqarput.
-Aallartinnermiit naammassinissaasa tungaanut - atuartut isumassarsiaat tunniusimanerallu suliniummik kivitsisuupput. Atuartut namminneq isumassarsiaminnut tunniusimapput, nioqqusiariniakkaminnillu ineriartortitsinissaminnut pitsanngorsaanissaminnullu piffissaq annertooq atorsimallugu. Suliniut malinnaavigineqarluarluni akuersaarneqarpoq, atuartullu atuarfimmi suliaat allanit naleqartinneqarnerat misigitinneqarnera pitsaasuuvoq, Qinnguata Atuarfiani ilinniartitsisoq Morten Flø Pallesen paasissutissiivoq.
Atuartut taakku sisamat Danmark-imeereerlutik tikimmata tikilluaqquneqarluarput, ilaatigut timmisartumiit niunerini ikiuiartorluni qamutit motoorillit timmisartup eqqaanut unillutik sigartartinneqarmata.
Taamatullu innuttaasut 50-it missaanni pilluaqqusiartorlutik niuffiorput.