Innuttaasunik oqallitsitsineq, pikkorissaanerit, ilaqutariinnillu ataatsimeeqateqarnerit. Qeqqata Kommuniata ilaqutariinnut aaqqissugaannut, nunaqarfimmiut peqataanissaminnut periarfissaqarluarsimapput.
Tamatuma saniatigut suliniutit arlallit uninngasimasut aallarnisaqqinneqarput, soorluttaaq peqatigiiffinnik pilersitsisoqartoq.
- Tamanna patsisaalluni innuttaasut, minnerunngitsumillu ilaqutaasut ataatsimoorlutik assigiinngitsunik sammisassaqartinneqarsimapput, taama suliniutinut siunnersorti Helga Nielsen aamma pinaveersaartitsinermi siunnersorti Agnethe Berthelsen, Sarfannguani atuarfimmi meeqqerivimmilu aqutsisut suleqatigalugit aaqqissuussisimasut oqaluttuarput.
Kommunimi atuutileqqammerluni ilaqutariinnik isumasioqatigiissitsineq, nunaqarfimmi ilaqutariinnut qulingiluaasunut isumasioqatigiissitsinikkut aamma ilisaritinneqarpoq.
- Periuseq tamanna ilaqutariit iluarisimaartorujussuuaat. Oqartussat akulerutinngikkaluarlugit ilaqutariinni pissutsit iluarsineqarnissaannut, perorsaanermilu tapersersoqatigiinnissaq pillugu isumaqatigiissuteqarpugut. Tamanna ataasiakkaanit ajornartinneqaraluarpoq, amerlanerilli sakkussaminnik pissarsipput, tamannalu januaarip tungaanut misilittarneqassalluni. Isumaqatigiissutit piviusunngortinneqarsimanersut, iluaqutaasimanersullu paasiniarlugu naliliinermik ataatsimiittoqassaaq, aaqqissuisut oqaluttuarput.
Eqqartoruminaattut qaqilerneqarput
Sarfannguanut tikeraarneq aamma pikkorissaanernut, oqalugiarnernullu atorneqarpoq. Atuarfimmi, meeqqerivimmilu sulisut kiisalu pinaveersaartitsinermi siunnersorti Kammagiitta pillugu pikkorissaanermut kiisalu nakkarsaasarneq pillugu Helga Nielsen-ip oqalugiarneranut peqataapput.
- Tassani inunnik nakkarsaasarnermi qisuariaatigineqartartut itisilerneqarput. Tamanna pillugu nunaqarfimmi pisimasut assigiinngitsut aamma qaqilerneqarput. Taassuma kingorna innuttaasut siunnersorneqarput, Helga Nielsen paasissutissiivoq.
Nakkarsaasarnerup saniatigut oqimaatsut allat aamma eqqartorneqarput; imminortarneq, annaasaqartarnerlu.
- Imminornissamik eqqarsaateqartarnerit, soriarsinnaanngitsutut misigisimasarnerit, qanorlu ikiuisoqarsinnaanersoq eqqartorpagut. Ilaqutariittut nammineq qanoq-iliortoqarsinnaava? Inuttut pisariaqartitat nammineq qanoq isumagineqarsinnaappat? Sorpassuit qaqilerneqarput, innuttaasullu aliasuutitik ammasumik oqaluttuaraat, malitsigisaanillu illarnertalimmik innuttaasut imminnut aliikkusersorlutik, aaqqissuisut oqaluttuarput paasissutissiissutigalugu, meeqqanut immikkut aaqqissuussaqarsimasoq.
- Aaqqissuussinerit tigulluarneqartut takuneqarsinnaavoq. Tamanna pisariaqartinneqarsimaqaaq. Assersuutigalugu Sarfannguani inuusuttut innuttaasunik suleqateqarluarput, innuttaasullu ataatsimoornissaannut patsisaaqataallutik, Helga Nielsen aamma Agnethe Berthelsen naggasiipput.