Sisimiunit utoqqaat iluatsitsilluarsimasut 16-it, novembarip 19-iani Italiamut aallarput.
Ukioq mannami Qeqqata Kommunia utoqqarnik angalatitsisarnermut aallartitseqqillutik aningaasaliissuteqartaleqqipput.
Angalanissarlu sumut ingerlassanersoq pillugu, utoqqaat namminneq toqqaanissamik periarfissinneqarput.
-Utoqqaat peqatigalugit sumut angalanissaq pillugu ataatsimeeqatigiippugut, Qeqqata kommuniani Utoqqarnut immikkoortortaqarfimmi immikkoortortami aqutsisoq, angalatitsisut marluusuni aappaasoq, Søren Alaufesen oqaluttuarpoq.
Makitsinikkut angalanissamut peqataasussat makinneqartarput, nalinginnaasumillu qinnuteqartut 30-t sinnikkajuppaat. Makitsinissamut siullermeertumik qinnuteqartut pingaarnerutinneqartarput, siusinnerusukkullu angalasimasut aamma ilanngunneqartarlutik, taamaaliornikkullu akuleriisinneqartarlutik.
Angalanissap tungaanut pisinnaajunnaartunik nalunaartoqartarpoq, tamannalu qinnuteqartunut allanut periarfissiisarluni.
Angalaneq misigisaqarfiulluartoq
Kalaallit Nunaanni Qeqqata Kommunia maannakkut kisiartaalluni utoqqarnik nunanut allanut angalatitsinissamik periarfissiisarpoq. Angalanissamut najugaqarfissamullu kommuni aningaasanik aalajangersimasumik annertussusilikkamik immikkoortitsisarpoq, tassani aningaasartuutissat sinnerinut utoqqaat namminneq akiliuteqassallutik. Utoqqaat malinnaasinnaanissaat anguniarlugu, sapinngisamik sipaaruteqarfissarsiortoqartarpoq. Angalaarluarsimaqaallu.
-Angalatitsisuusugut angalasullu siusinnerusukkut iItaliamiinnikuusimanngilagut, taamaalillunilu illoqarfimmi angalaarnermut, takusassanut, pisiniarfinnut tuniniaavinnullu alakkarterinermut ullut atorneqarput. Takornarianik angallassisulerluta bussinik angalaarpugut, taamaalillutalu Napoli kiisalu Italiamiut kulturiannik annertuumik takusaqarluta, Søren Alaufesen oqaluttuarpoq nangillunilu:
-Innermik anitsisartutoqaq Vesuvio alakkartertussaagaluaratsigu, ajoraluartumilli matoqqasimavoq. Taamaakkaluartorli utoqqaat misigisaqartupilussuupput, arlallillu nuannisaarsimanerarlutik utertiffigivaatigut, naggasiivoq.
Angalaqatigiittut illoqarfiup qiterpasissuani, qimutsuitsoqarfiup ungasinngisaani, hotelimi qanganitsanik pisatsersukkami najugaqarput.
Utoqqaat Sisimiuneersut kisimik angalanikuusimanngillat. Maniitsumiillu utoqqaat kiisalu nunaqarfinniit ataasiakkaat, Sisimiuni utoqqaat angalanissaat sioqqutilaarlugu Mallorca-mut angalaarput.
Ukiup tullissaanut Kommunalbestyrelsi siunertamut aningaasanik ammaarluni immikkoortitsivoq.