airplanebooksbriefcase business cogs cross election entertainment fish house law lockmedicalpeopleselfservices socialtax

Arctic Circle Road - kiffaanngissusermut aqqut

Ullumikkut ataatsimoorussamik nalunaarusiarput ”Arctic Circle Road aqqutigalugu takornarialerinerup ineriartortinneqarnissaa” imaluunniit kiffaanngissusermut aqqut, professor Minik Rosing-ip taagortarneratuut, pisortatigut saqqummiupparput.
Allattut Malik Berthelsen, Qeqqata Kommuniani borgmesteri aamma Petrus Olsvig-Kleist, Arctic Circle Business-imi siulersuisuni siulittaasoq
9. maj 2019

Takornarissanut unnuisarfissannik namminersortunit aningaasaliisoqarnikkut, Arctic Circle Road-imik sanasoqarnissaa inuiaqatigiinni aningaasaqarnikkut imminut akilersinnaasoq nalunaarusiap takutippaa. Takornariaqarnerup annertusiartornerata inuit akileraarutaannik pisortanullu akileraarutinik annertuumik nassataqarmat, Arctic Circle Road pisortanit aningaasaliiffigineqartariaqaraluarpoq.

Nalunaarusiaq tamakkiisumik uani aaneqarsinnaavoq:

”Arctic Circle Road aqqutigalugu takornarialerinerup ineriartortinneqarnissaa”

Takornarianut siniffissat nutaat 838-t  

Nunap immikkoortuani ingerlatsisut namminersortut Arctic Circle Road sananeqarpat hotel-ini, unnuisarfinni illuaqqanilu takornarissanut siniffinnik 838-nik pilersitsiniarput. Takornarissanut siniffiit arlaqartut taakku Sisimiuni, aqqut sinerlugu pingaartumillu Kangerlussuarmi pilersinneqassapput.

Arctic Circle Road pingasunik tunngaviliilluni takornariaqarnermut allannguisuusussaavoq:

    1. Illoqarfiit marluk akornanni akikinnerusumik, eqaannerusumik, imminnullu atanngitsumik angallassinissamik aqqusineq periarfissiissaaq
    2. Aqqusineq nunap immikkoortortaanik ammaassisuussaaq
    3. Amerikarmiut base-ata matunerata kingorna ingerlatsisunit namminersortunit aningaasaliiffiginissaannik tunuarsimaarfigineqarsimasumut, Kangerlussuarmi hotel-inut aningaasaliinissamut tunngavissamik aqqusineq qulakkeerisuussaaq,

Ukioq naallugu takornariartitsineq 

Destination Arctic Circle ukioq kaajallallugu takornariarpassuaqartarluni ingerlalluarpoq. Nunap immikkoortuani ukioq kaajallallugu takornarissanut arlalinnik neqerooruteqarpoq, assersuutigalugu Sermersuup tungaanut aqqusineq, Arctic Circle Trail aammalu UNESCO nunarsuarmioqatigiinnut kingornussassaq Aasivissuit-Nipisat.

Nunap immikkoortuanili ukiup ingerlaneranut agguataarlugit misigisassarsiorfissarpassuit aallartinneqarnikuupput, taamaalilluni nunap immikkoortuanukarnissamut tunngavissaqartuaannarpoq. Ukiuunerani takornarialerineq soorlu qimusserneq, qamuteralaat, ujakkaarneq, heliski, fatbike, arsarnerit allallu aasaanerani sammisassanut soorlu pisunnermut, umiatsiamik angalanermut, eqalunniarnermut tapertariipput.

Takornarialerinermut inuutissarsiortut unnuisarfinnut, atorfinnullu najugaqavissunik sulilersitsinissamut aningaasaliinissaannut, ukioq kaajallallugu takornarialerineq tunngaviliivoq. Aasaanerani sivikitsukullammik ulapaarfiusumi sumiiffinni arlalinni avataanit sulisussaqarniarneq pinngitsoorneqarsinnaaneq ajorpoq.

Arctic Circle ilisarnaataa 

Destination Arctic Circle-p ukiorpassuarni Arctic Circle Business, suliffeqarfiit, kommuni namminnerlu piumassutsiminnik kattuffiit ingerlasut suleqatiginerisigut, ilisarnaasiarisimasamut suli annertunerusumik pissarsiaqaateqarfiginissaanut Arctic Circle Road takornarialerisunut periarfissiivoq.

Assersuutigalugu Arctic Circle Race-mi peqataasartut siunissami ujakkaarluni unamminissaq sioqqullugu kingornaluunniit Kangerlussuarmiit Sisimiunut ingerlaarsinnaanngussapput, aqqutaanilu unnuisarfinni atugarissaarnarnerusuni ineqartarsinnaallutik. Assersuutigalugu siunissami fatbikes atorlugit Arctic Circle Trail-imi ingerlasut aqqutiminni neriniartarfinni pitsaasuni nerisassanik sassaalliivigineqartalissapput.

A/S Arctic Circle Traffic-imit Arctic Circle Road-ip pilersinneratigut, Kangerlussuullu Mittarfiata siunissaata kiisalu Arctic Circle Immikkoortumi attaveqaqatigiinnermi atugassarititaasut qulakkeerneratigut, tamakku tamarmik pisinnaalissapput.

Immikkoortunik allanik suleqateqarneq 

Kalaallit Nunaata sinnerata qanimut suleqatiginissaanut qilanaarpugut, pingaartumillu Ilulissani Nuummilu mittarfissat nutaat. Siunissami takornarissanik kaajallaatitsisarnerit Kangerlussuarmiik Arctic Circle Road aqqutigalugu Sisimiunut, naggataatigut mittarfiit nutaat arlaannit timmisartorluni Kalaallit Nunaanni takornariaqarnerup qaffarujussuarneranik malitseqassapput.

Nunap immikkoortortai allat Destination Arctic Circle-mi ukioq kaajallallugu takornariarpassuit nunap immikkoortuinut allanut ingerlaqqittarnissaat nuannaarutigissavaat. Mittarfinni allani ilaasussaqartitsissapput, aamma aasaanerata avataani.

Naalakkersuisut aamma Inatsisartut Arctic Circle Road pillugu atuarunik allat assigalugit WOOW-imik oqarnissaat maanna qilanaaraarput. Club La Santa kisimi timersoriarlutik/misigisassarsioriarlutik takornariarpassuarnik tikiffigineqartarsinnaanngilaq. Dolomit-it kisimik aasakkut ukiukkullu assigiinngitsunik takornariaqarnermut neqerooruteqartanngillat. Island kisimi takornarissanik aqqusinermukaassisartuusinnaanngilaq. Destination Arctic Circle-mi aamma uagut taamaaliorsinnaavugut.