Allannguutip taassuma kingunerissavaa, Qeqqata Kommunia maannakkut marlunnik pisortaaneqarani siunissami pisortaanerit pingasunngussasut. Maannakkut pisortaasut tassaapput Kommunimi pisortaaneq Kommunimilu pisortaanermut tullersorti. Aaqqissuussaanerup misissuiffigineqarnerani paasinarsivoq pisortaanerit marluusut sulipiluppallaartartut, pisortaanerillu pingasunut akisussaaffinnik agguataarinissaq naapertuuttuusoq.
Aqutsisut ilusaat nutaaq:
1. Kommunimi pisortaaneq, pisortaanerunermi saniatigut teknikkimut aningaasaqarnermullu pisortaajutigisoq.
2. Nutaaliornermut ilinniartitaanermullu pisortaaneq.
3. Atugarissaarnermut suliffissaqartitsiniarnermullu pisortaaneq
Taakkualu tamanut ammasumik qinnuteqartitsinikkut inuttassarsiuunneqassasut kommunalbestyrelsi aalajangiivoq.
Aqutsisut ilusissaatut nutaaq pillugu aalajangiinermi, pisortaanerusut marluusut nalunaarutigivaat atorfinnut qinnuteqarniaratik.
Tamatuma saniatigut ataatsimiititaliat ilusilersugaaneranni appaasoqassasoq Kommunalbestyrelsi aalajangiivoq, ataatsimiititaliallu arfiniliusunit ataatsimiititalianut sisamanut, tullinnguuttutut appartinneqarlutik:
1. Aningaasaqarnermut, inuussutissarsiornermut takornariaqarnermullu ataatsimiititaliaq
2. Teknikkeqarnermut, Avatangiisinut, Nunaqarfinnut, aatsitassanut, aalisarnermut piniarnermullu ataatsimiititaliaq
3. Ilinniartitaanermut, Kultureqarnermut Sunngiffimmullu sammisanut ataatsimiititaliaq
4. Atugarissaarnermut, Suliffissaqartitsiniarnermut Pinaveersaartitsinermullu ataatsimiititaliaq
Kommunalbestyrelsip aggustimi ataatsimiinnissaani ataatsimiititaliat ilusilersugaanerat nutaaq suliarineqassaaq.