Nuannaarutigaaqaarput 2020-mut aningaasanut inatsimmut isumaqatigiissusiortut Sisimiut Kangerlussuullu akornanni aqqusinniornissamut pilersaarusiornissamut 5 mio.-kr.-inik aningaasaliimmata.
Aalajangerneq tamanna Qeqqata Kommuniata takornariaqarfittut ineriartortinneqarnissaanut aalajangiisuullunilu pingaarutilerujussuuvoq.
Kangerlussuup Sisimiullu akornanni aqqusinniornissaq ukiorpassuit Qeqqata Kommuniani anguniagaanikuuvoq qasusuilluni suliamullu upperinnilluinnarluni ingerlanneqarsimasoq.
Aqqusineq aqqutigalugu nunarujussuaq takornariaqarnikkut atugassatut ammaanneqassaaq, unnuisarfiit misigisassallu assigiinngitsorpassuit inerisarneqassapput, soorlu Island-imi Golden Circle taamatut suliarineqarsimasoq. Minnerunngitsumillu innuttaasunut pinngortitap tikikkuminarnerulernissaa periarfissarpassuarnik ammaassissaaq.
Qeqqata Kommuniata nammineq aqqusinniornissamut suliniummut 50 mio. DKK-nik immikkoortitsereernikuuvoq Kangerlussuarmiik Aasivissuarnut aqqusiniliornissamut aammalu ATV-it aqqutissaanut Kangerlussuarmik Sisimiunut, minnerunngitsumillu nalunaarusiaq “Arctic Circle Road – aqqutigalugu takornarialerinerup ineriartortinneqarnissaa” ukioq manna saqqummiupparput. Maannalu suliniut piviusunngorsinnaalermat innuttaasut sinnerlugit Inatsisartunut Naalakkersuisunullu qujarusuppugut suliassallu naammassinissaa Qeqqata Kommunianiit pimoorullugu suleqataaffigissavarput.
