Suluk - Air Greenlandip timmisartuni atuagassiaataani allaaserisaq tunngavigalugu, suliniaqatigiiffissuarmi "United Planet"-imi siulittaasumit pilersitsisumillu Dave Santullimit Kangerlussuarmi Qinnguata Atuarfia attaveqarfigineqarpoq.
Nunarsuarmi tamarmi nammineq kajumissutsiminnik ikiuuttunik kiisalu avatangiisit pillugit nunarsuaq tamakkerlugu suleqatigiinnermik ukkataqarnermik aaqqissuussisarnikkut nunarsuarmiut qaninnerulernissaannik United Planet suliaqarpoq. Kalaallit Nunaat Sermersuarlu ukkatarineqarpallaaqimmata, nunarsuarmi klassit arlallit akornanni klassit suleqatigiinneranni Qinnguata Atuarfiata peqataanissaa Dave Santullip kissaatiginikuuvaa.
Atuartut nutaaliornermi unamminermi peqataanikuusut allakkiami Dave Santullip atuaramiuk, atuarfiup peqatiginissaa pitsaasuussasoq eqqarsarpoq. Suliniut oktobarimi aallartippoq. Qinnguata Atuarfiata saniatigut Jordanimit klassit pingasut, Irakimit klassi ataaseq kiisalu USA-mi Indianamit klassi ataaseq peqataapput:
Ukiap ingerlanerani klassit video atorlugu tallimariarlutik ataatsimiinnikuupput aamma internet atorlugu tallimanik suliassaqarsimallutik. Suliassat kulturimut nutaaliornermullu tunngassuteqarput. Qeqqata Kommuniani atuarfinni tamani ukiakkut ingerlanneqartut, Nunarsuarmi anguniakkat pillugit nutaaliornermik sapaatip akunneqartitsinermi sammisat Qinnguata Atuarfiani atuartut ingerlateqqippaat. Plastik sammineqassasoq toqqarpaat. Kangerlussuarmi plastikkit eqqaavissuarmi ikuallanneqartarput. Ajoraluartumik ikuallaaveqanngimmat sumut tamaanga teqqalasarput. Taamaattumik ajornartorsiut taanna qaangerniarlugu periarfissanik assigiinngitsunik atuartut misissuipput, tassunga ilanngullugit misissorpaat atoqqiisinnaaneq, plastikkit arrortinneqarsinnaasut kiisalu ikuallaavimmik sanaartorneq. Atuarfiit allat innaallagissamik atuinerup appartinneqarsinnaaneranik, Syriamit qimaasunik orpinnillu naatitsinermik suliaqarput.
Kulturit allat qanoq inuuneqarnersut avatangiisillu pillugit eqqarsaateqartarnerat atuartut paasinninnerat pitsaasorujussuuvoq.
”Qinnguata Atuarfiani atuartut tallimat peqataapput aammalu nunani allani klassinut tuluttut oqalullutik suliniummik saqqummiipput. Kulturit allat pillugit ilikkagaqarluarsimallutik tamarmik oqariartuutigivaat. Sumiiffinni allani inuusuttut atuarfimminni suliniutinik qanoq suliaqartarnersut takullugit isinut ammarsaatanikuuvoq" Qinnguata Atuarfiani atuarfiup aqutsisua Jens B. Scharnberg oqarpoq.
Paasisaqarnerorusukkuit uunga attaveqarit:
Jens B. Scharnberg Tlf. 841027
