Taamaattumik pingasunngornermi decembarip 18-iani Sisimiuni Maniitsumilu allaffissuarmi sulisut siullermeertumik ataatsimoorlutik pisoqatigiipput. Siunissami qaammammut ataasiarluni sapaatip akunneranut ataasiarluni aalajangersimasumik minutsini 15-ini sungiusartarnerup ilaatut minutsini 15-ini allaffissuarmi sulisut ataatsimoorlutik pisoqatigiittassapput.
Sulisunut peqqissutsikkut atugarissaarnermullu 2017-imili kommuni suliaqarnikuuvoq. Tamanna ilaatigut inuummarissaasunik ilinniartitsinikkut aammalu sulisut sapaatip akunneranut minutsini 15-ini suliffimminni peqqinnartumik sammisassanut peqataanissaannut akuersisarnikkut pisarpoq.
Borgmester Malik Berthelsen-ip neriuutigivaa, allaffissuarmi qarasaasiaq allaffillu qimalaarlugu sulisunut ataatsimut pisoqatigiittarneq nuannaarnermik inuummarinnerulernermillu kinguneqarumaartoq. Pisoqatigiittalernitsigut suliffiullu nalaani timimik atuisarnitsigut 2030-mi Kalaallit Nunaat nunarsuarmi timimik atuinerpaanngortinnissaanut anguniagaqarnerput timitalersorparput.
