-Paasigakku tupaallappunga, naatsorsuutigisimannginnermik. Nuanneqaaq tuppallerneqaaq, ikinngutit ilaquttat qujanaq, nukissanik tunisivusi, Thor Kristoffersen Sisimiuni kommunip allaffiani nersornaaserneqareerluni oqalugiarnermini ilaatigut taama oqarpoq.
Thor Kristoffersen Paamiuni 1944-mi inuuvoq, nuliarigaluanilu Karen arfinilinnik qitornaqarput, 1978-imilu Sisimiunut nuunnermi kingorna Thor nulianilu inuiaqatigiinnut assigiinngitsutigut suliniuteqartarsimapput, soorlu timersoqatigiiffik SSP aqutseqataaffigisimavaat, Thorilu tunniusimalluni sunngiffimmi atugassarititaasut arlallit ineriartorteqataaffigisimallugit. Tamakku saniatigut Thori qanga fritidsnævnimik skolenævnimillu taasaannik siulittaasuusimavoq, Thorilu Sisimiunut nunatsinnullumi inuiaqatigiit ineriartornerannut sunniuteqaqataasimalluni.
Thorip ilisimaneqaataasa ilagaat erinniorneq taalliornerlu, saqqummersitaalu nunatsinni nuannarineqarluarpoq.
Thor Kristoffersen Qeqqata Kommunianiit pilluaqquarput.
