Asasakka innuttaasut, tamatta nalunngisatsituut imaannaanngitsumi tamattalu siusinnerusukkut misigisimanngisatsinnik inissisimavugut.
Kommunimilu assigiinngitsutigut aalajangiisimanigut sulisutsinnut innuttaasunullu paatsuungatitsinerat paasilluarsinnavarput, akisussaaffillu tamakkiisumik uagut tiguarput.
Soorunami siullermik utoqqatsissutigissavarput nassuiaanissarput siusinnerusukkut pisimanngimmat.
Siullermik allaffeqarfissuup matoqqatinneqarneranut tunngaviuvoq, nalunartut pillugit arlaatigut pisoqassagaluarpat napparsimasoqaleraluarpalluunniit innuttaasunik sullissinitta unittuunnginnissaa qulakkeerusukkatsigu.
Imaanngitsoq allaffissuarmi imaluunniit uagut aalajangiisartugut immitsinnut illersornerunissarput pissutigalugu.
Tassami allaffeqarfissuarmi sulisut arlaat napparsimalissagaluarpat sulisut amerlanerpaat imaluunniit tamarmik angerlartinneqartariaqalertussaapput.
Taamaattoqassappallu innuttaasunik sullissineq tamarmi unittoortussaavoq.
Tamannalu soorunami pinngitsoortikkusupparput, pissutigalugu kiffartuussinitta ingerlaannarnissaa innuttaasut pinngitsoorsinnaanngimmassuk.
Aalajangiinitta siusinnerusukkut nassuiaatiginnginneri pissutigalugit, tupinnanngitsumik ilaatigut uparuartorneqarpugut meerartagut, atuarfinni meeqqerivinnilu sulisugut ilanngullugit allaffissuarmi sulisuninngaanniit illersunnginnerugigut.
Oqaatigissavarpullu tamanna ilumuunngimmat.
Tassami tamaavitta soqutigisarivarput meerartatta aammalu sumiluunniit sulisutta peqqissusaasa illersorneqarnissaat.
Tassami eqqaamassavarput aamma uagut aalajangiisartugut meerartaqarpugut suli meeqqerivinniitunik atuartunillu.
Taamatut qaffasissumik akisussaaffeqarluni inissisimagaanni, sunilluunniit annertuunik aalajangiitigani eqqarsarluaqqaarnissaq assigiinngitsunillu qulakkiigaqarnissaq pisariaqartarpoq.
Soorlu Qeqqata Kommuniani 2.200-t missaannik atuarfinni meeqqerivinnilu meerartaqarpugut.
Sulilu napparsimalersoqartinnagu imaluunniit tuniluuttoqalertinnagu atuarfiit meeqqeriviillu matusimassagaluarutsigit,
taava meerarpassuit paarsisussaqanngitsut angajoqqaavisa angerlarsimasariaqalernerisigut,
suliffeqarfippassuit innuttaasullu kiffartuunneqarnerisa unittuunnginnissaat qanoq isilluta qulakkeernissaat eqqarsaatigilluartariaqarparput.
Aalajangiinigullu nuannarineqanngikkaluartut allatut ajornartumik naammagittalaartariaqarnissarput inussiarnersumik kaammattuutigissavarput.
Taamatut oqarnitsinni neriuppugut imatut paasineqassanngitsoq, aningaasaq peqqinnissamiit pingaarnerutikkipput.
Taamaattoqanngilarmi, uanili pivarput eqqarsaatigilluartariaqaripput inuiaqatigiittut qanoq isilluta unittuuinnginnissarput.
Angajoqqaat meeqqaminnik angerlarsimatitsiinnarusullutik aalajangernerat soorunami ataqqivarput. Aammalu ulluni makkunani atuariartunngitsorpassuit akuerineqaratik atuanngitsutut allanneqassanngillat.
Soorunami pisut malinnaavigeqqissaarpagut aamma soorunami pisariaqalivippat matusinissarput allaqqussinnaajunnaassavarput.
Aap, tamaavitta ernumavugut, aamma uagut ilanngulluta.
Pingaaruteqarporli uippallersimanaveersaarnissarput.
Taamaattumik inussiarnersumik kaammattuutigissavarput, uagut angajoqqaatut oqaatsitigut facebook-imilu pissusilersuutitta meerartatsinnut qanoq sunniuteqarsinnaaneri eqqarsaatigilluartarnissaat.
Tassami meerartatta toqqissisimajunnaarnissaannut toqqissisimanissaannulluunniit uagut angajoqqaatut pissusilersuutigut pingaarutilerujussuupput.
Naggataatungaatigullu inussiarnersumik kaammattuutigissavarput, pisumi ilungersunartumiikkaluarta sapinngisamik aamma eqqissisimasumik nuannersumillu aamma inuuneqarnissatta puigunnginnissaa.
Tassami suna tamarmi alianartunngortikkutsigu ernumaannaavillutalu inuiaqatigiittut nikalloraluttuinnarlutalu nukissaarukkaluttuinnassaagut.
Taamaattumik aamma immitsinnut qiimmassaqatigiinnissarput innersuussutinillu malinninnissarput aatsaat taamak pingaaruteqartigaaq.
Qujanaq.
/ Borgmesteri Malik Berthelsen