“Neriuutigeqaarput pilersaarutit malillugit ingerlalluassasoq, taamatuttaaq ATV-inut aqqusinissaq kingusinnerpaamik aappaagu naammassineqassasoq, taamaasilluta kingusinnerpaamik aappaagu ATV-nik Sisimiunut apuussinnaassalluta”. Borgmester Malik Berthelsen oqarpoq.
Kangerluarsuk Tulliup Sisimiullu akiornanni aqqusinermut (imm. 2) ASN-imik nalunaarusiaq nutartigaq neriuutigineqarpoq ukioq manna inaarutaasumik akuersissutigineqassasoq.
Aqqusinniornermik aallartisarneq
Borgmester Malik Berthelsen aamma MT Højgaard aallartitaa peqatigalugu Kangerlussuarmi Kellyvillemiit 2020-mi ataasinngornermi juulip 20-ani nivariaqqaartoqarluni aqqusinermik sanaartornermik allarnisarnissaq Qeqqata Kommunianiata pilersaarutigaa.
Tassunga atatillugu ataasinngornermi juulip 20-ni Sisimiut Kangerlussuullu akornanni aqqusinermik sioraasumik aamma ATV-nut aqqusinissamut nivariaqqaarnissamut innuttaasunut, tusagassiortunut allanullu soqutiginnittunut najuukkusuttunut Qeqqata Kommunia qaaqqusivoq, tassani mittarfiup illutaanit (buusinut unittarfik) nal. 16:30 Kangerlussuarmiit Kellyvillemut buussinik ingerlanissaq aaqqissuunneqarluni. Nivariaqqaarnissarlu pissalluni nal. 17:00.
”Nivariaqqaarnissamut assorsuaq qilanaarpunga, taamaalilluta Kangerlussuarmiit Sisimiut tungaanut aqqusinissap aallartinnissaa avammut takutittussanngoratsigu. Tassungalu atatillugu Kangerluarsuk Tullermiit Sisimiut tungaanut aqqusiornissap kingulliup (imm. 2) Naalakkersuisuniit aamma akuersissutigineqarnissaanut isumalluarpunga. Anguniarparput 2021-imi aqqusinersup Sisimiunut apuutivinnissaa. Qilanaaqaangalu kalaaleqatigut nunarsuarmioqatigullu pinngortitami tupinnaannartumik kusanartumi ATV-inik cykelinillu misigisassarsiorlutik angalasut takusalernissaannut, Malik Berthelsen oqarpoq”