Suleqatigiinnissap siunertarivaa, Kalaallit Nunaannut tunngasumik ataatsimut suliniuteqarneq, suliniummi ukiuni 20-ni kingullerni Islandip pinaveersaartitsinermut suliniuteqarnikkut misilittagai isumassarsiorfigineqassapput, taamatullu aamma Qeqqata Kommuniani meeqqat inuusuttullu akornanni inuulluataarnerup peqqinnissallu siuarsarneqarnissaa anguniarneqassalluni.
Taakku illuatungeriit pingasut suleqatigiilluarsinnaapput, Qeqqata Kommuniata kommunip iluani meeqqanut, inuusuttunut iluaqutissanullu tunngasut ilisimasaqarfigilluarpai, Paarisa peqqinnissaq pillugu siuarsaanerup pitsaaliuinikkullu tunngasutigut ilisimasaqarluarpoq, taamatullu aamma Kalaallit Nunaanni Center for Folkesundhed innuttaasut peqqissusaat pillugu ukiorpassuarni ilisimatusarnikuuvoq.
"Qeqqata Kommuniata, Center for Folkesundhedip Paarisallu akornanni suleqatigiinnissamut isumaqatigiissut peqqinnissaq pillugu siuarsaanerup aammalu pitsaaliuineq pillugu suliaqarnerup qanimut pisussaaffilimmillu suleqatigiinnikkut nukittorsarneqarnissaat periarfissaavoq immikkuullarissoq. Suleqatigiinnissamik isumaqatigiissut Paarisami inuiaat peqqinnerulernissaat pillugu suliniummi Inuuneritta III-mi nutaajuvoq, tassani ataatsimut inuunerissaarnerulernissap pilersinnissaa aallaaviulluni. Peqqinnissamut atatillugu siuarsaanermut pitsaaliuinermullu suliniutit oqaloqatigiinnikkut kissaatigisanillu, pingaartitanik najukkamilu sunik aallarnisaasinnaanissamut tunngatillugu eqqartueqatigiinnikkut ineriartortinneqartariaqarput. Suleqatigiinnissamummi isumaqatigiissuteqarnermi tamakku periarfissaassapput”, Paarisami immikkoortortami, Pitsaaliunermut Isumaginninnermullu tunngasunut Aqutsisoqarfimmi pisortaq Ditte Enemark Sølbeck oqarpoq.
Suliniutit ataatsimoorussat Kalaallit Nunaanni 1994-imiilli ukiut sisamakkaarlugit HBSC-mik misissuinernik ingerlanneqartartunit Meeqqanik atuartunik misissuinernit paasisanik aallaaveqassapput. Misissuinerup 5.-10. klassimi atuartut akornanni peqqissuseq atugarissaarnerlu qanoq innera takussavaa. Illuatungeriit misissuinermi inerniliussat pitsaaliuinermi anguniagaqartumik suliniuteqarnermut atorneqarsinnaanissaat kissaatigaat. Isumasioqatigiinnerit workshoppillu arlallit aqqutigalugit kommunimi immikkoortut assigiinngitsut akuutinneqarsinnaapput, taamatullu aamma Qeqqata Kommuniani innuttaasut pitsaaliuinermik suliniutinik ineriartortitsinermi ingerlatsinermilu akuutinneqarsinnaassallutik.
Statens Institut for Folkesundhedimi Kalaallit Nunaanni Center for Folkesundhedimi aqutsisoq, Ilisimatusarfimmilu attuumassuteqartumik ilisimatooq, Christina Viskum Lytken Larsen oqarpoq: ”Suleqatigiilernermi najugarisami misilittakkat qanoq allannguisinnaanerannut uppernarsaaqataasinnaanissarput neriuutigaarput. Taamatullu Ilisimatusarfimmi peqqissutsimut siuarsaanermut pitsaaliuinermullu tunngasunik ilisimatuussutsikkut piginnaasanik alliartortitseqataanissarput kissaatigalugu."
Qeqqata Kommunia, Center for Folkesundhed amma Paarisa neriuutigaat, suliniut innuttaasunit siammasissunit tapersersorneqassasoq. Suliniutit iluatsittumik ingerlassappata, innuttaasut aamma akisussaassuseqartumik suliniummut tunniusimasariaqarput.
Qeqqata Kommuniani Borgmesteri Malik Berthelsen suliniummi anguniarneqartut pillugit ima oqaaseqarpoq: ”Suleqatigiissitaq maanna kommunimi meeqqat peqqissusaannut atugassarititaannullu tunngatillugu pitsaanerusoq anguniarlugu pingaarutilinnik siullertut alloriaateqalerpoq. Kommunitsinni ilisimasaqassutsip ineriartorteqqinneqarnissaa, aammalu illuatungileriinni nukittuffiit assigiinngitsut atorluannissaat nuannaarutigaara. Neriuutigaaralu, kommunip suliniutaa tigulluarneqassasoq, taamatullu aamma anguniakkamik piviusunngortitsisinnaassalluta, meeqqanik inuusuttunillu sullissisut angajoqqaat peqatigalugit kivitseqatigiillutik meeqqat ukiut 10-20-lluunniit qaangiuppata peqqissutut nuannaartutut ilisimaneqalernissaat anguniarlugu.
Suleqatigiinnissamik isumaqatigiissut siullertut 2022 ilanngullugu atuuttussanngortinneqarpoq, illuatungeriilli akornanni isumaqatigiinnikkut sivitsorneqarsinnaalluni. Qeqqata Kommuniani meeqqanik atuartunik misissuineq 2020-mi aggustimi septemberimilu ingerlanneqaqqipput, taakkulu pitsaaliuinermut suliniummi suleqatigiissutiginiakkami siullermi tunngavilersuutitut atorneqassapput.
Annertunerusumik paasisaqarusukkuit uku attavigikkit:
Malik Berthelsen, Qeqqata Kommuniani borgmesteri
mabe@qeqqata.gl, +299 86 73 00
Else Finne, Qeqqata Kommuniani Ilinniartitaanermut pisortaq, Sisimiut
elfi@qeqqata.gl, +299 86 73 25
Christina Viskum Lytken Larsen, Kalaallit Nunaanni Center for Folkesundhed-imi aqutsisoq
chly@sdu.dk, 45 25 32 84 86, +45 65 50 77 22
Ditte Enemark Sølbeck, Paarisami immikoortortami pisortaq
ditt@nanoq.gl, +299 34 60 37, +299 26 49 95
