Kalaallit Nunaanni meeqqanut inuusuttunullu aarlerinartumik inissisimasunut nukittunerusumik suliniuteqartoqarnissaq pillugu, kalaallit danskillu akimortumik suleqatigiinnerinut unnuisarfik ilaavoq.
Unnuisarfiup siunertaa
Meeqqat amerlavallaartut aarlerinartumik inissisimasut inersimasumit isumagineqarsinnaanatik inissisimaleriataarsinnaasarput angerlarsinnaasaratilluunniit. Meeqqanut aarlerinartumik inissisimasunut, unnukkut, unnuakkut sapaatillu akunnerata naanerani paarinerlunneqarnissamut, kinguaassiutitigut kannguttaatsuliorfigineqarnissamut sumiginnarneqarnissamullu aarlerinartorsiortunut ornittakkat ikippallaartutut nalilerneqarpoq. Taamaattumillu Sisimiuni meeqqanut inuusuttunullu tamanut unnuisarfimmik pilersitsisoqarpoq.
Meeqqat inuusuttullu aarlerinartumik inissisimasut unnukkut unnuakkullu, pingaartumik sapaatip akunnerata naanerani akissarsisoqarsimatillugu toqqissisimaffigisassaannik ornittagaqarnerup qulakkeerneqarnissaa unnuisarfiup siunertaraa. Unnuisarfik qimarnguviuvoq meeqqanut isumannaatsumiiffiusussaq. Unnuinissaq, nerinissaq aammalu inersimasumik akisussaasuusumik oqaloqateqarnissaq periarfissaassapput.
Atugarissaarnermut Ataatsimiititaliami siulittaasoq Hans Frederik Olsen unnuisarfik pillugu ima oqaaseqarpoq:
”Takusinnaavarput taama ittunik unnuisarfinnik pisariaqartitsisoqartoq, tamannalu ajoraluartumik nassuerutigisariaqarparput. Taamatulli suliniuteqarneq meeqqanut inuusuttunullu siunissamik pitsaanerusumik pilersitsinissamut pingaaruteqarluinnartuuvoq. Pisariaqartitaq aallaavigalugu unnuisarfimmi toqqissillutik sinissinnaassapput imaluunniit nerillutik. Neriuutigivaralu maani Sisimiuni pisariaqartitsisut tamarmik unnuisarfimmik atuilluarumaartut.”
Unnuisarfik meeqqanut 18-it inorlugit ukiulinnut, unnukkut aamma/imaluunniit unnuakkut ornitassamik pisariaqartitsisunut innersuussaavoq. Meeqqat aanngajaarniutitorsimasut unnuisarfimmi inini immikkut inissisimasuni silattorserlutik sininnissaminnut periarfissaqarumaarput.
Unnuisarfiup ammanerani minnerpaamik sulisunik aalajangersimasunik marlunnik sulisoqartassaaq. Unnuisarfimmi nammineq kajumissutsiminnik ikiuuttunik aamma sulisoqartarumaarpoq, pingaartumik akunnialuit siullerni meeqqanik isertunik tikilluaqqusinermi. Nammineq kajumissutsimik sulilluni ikiuukkusukkaanni uunga attaveqartoqarsinnaavoq sis.uddannelse@qeqqata.gl.
Unnuisarfimmi sulisut meeqqanik takkuttunik ikiuisussaatitaapput, meeqqallu tamarmik siumut innersuunneqaqqaaratik unnuisarfimmiissinnaatitaapput. Sulisut meeqqanut tusarnaarnissamut piareersimasussaapput aammalu meeqqat oqaaseqarnissaannik periarfississallugit. Tamatuma saniatigut sulisut sakkortusisamik nalunaaruteqartussaatitaapput, saaffiginnittullu tamaasa nalunaarsussallugit.
Sumiiffik ammasarfiillu
Unnuisarfik Sunngiffimmi ornittagaq Naasumiippoq, ammasassallunilu tallimanngorneq allortarlugu, akissarsiffinnut atatillugu, nal. 20:00-10:00 ullaap tungaanut.
Unnuisarfik 2020-imi oktobarip 16-iani ammassaaq.
Pisariaqartitsinikkut unnuisarfik ukiut suiaassuserlu malillugit agguataarneqarsinnaavoq.
Annertunerusumik paasisaqarusukkuit uku attavigikkit:
Nike Bertelsen, Atugarissaarnermut Pisortaaneq, Qeqqata Kommunia
nike@qeqqata.gl, +299 86 73 03
Annga Lynge, Ilinniartitaanermut Aningaasaqarnermullu Pisortaaneq, Qeqqata Kommunia
anly@qeqqata.gl, +299 86 73 80
Amos Frederiksen, Meeqqeriviit allaffeqarfianni Pisortaq
amfr@qeqqata.gl, +299 86 74 02