Platformimi ilaatigut Qeqqata Kommuniani atortulersuutit, nunaminertamik atugassiinerit sanaartornissamullu akuersissutit pillugit paasissutissat nassaarisinnaavatit. Kommuunimi ileqqoreqqusat atuuttut aamma nassaarisinnaavatit, assersuutigalugu eqqagassalerinermi aamma imeq errortuutikoq pillugit immikkoortunut tunngasut, aammalu kommuunip containerinut inissiiviinut, umiatsiaaqqanik inissiivinnut, qimmeqarnermut, puttasunut il.il. pillugit malittarisassat atuuttut.
Qeqqata Kommuniani illoqarfinnut nunaqarfinnullu ataasiakkaani immikkuualuttut ataasiakkaat pillugit nunap assingi nutarsakkat aamma nassaarisinnaavatit. Nunap assingatigut immikkoortuni malittarisassat suut atuunnersut kiisalu suut eqqumaffigisassarineritit, assersuutigalugu nutaamik sanaartornissamik suliniuteqassaguit, nassaarisinnaavatit.
Qeqqata Kommunia nutaanik pilersaarusiorpat, tamanullu tusarniaanermik ingerlatsilluni, tamanna aamma platformimi nutaami takuneqarsinnaavoq.
Kommuunip pilersaarusiorfigineqarnera digitaliusoq nutaaq maanna iserfigineqarsinnaavoq ugguuna http://pilersaarut.qeqqata.gl/.
Annertunerusumik paasisaqarasukkuit Teknikkeqarnermut Avatangiisinullu immikkoortortaq oqarasuaatikkut +299 70 21 00-ikkut imaluunniit e-mail sis.otm@qeqqata.gl attavigisinnaavat.