Nittartakkatigut atortut amerlanertigut innuttaasunit imaluunniit kommunimi nunaminertanut sullissisunit iserfigineqarsinnaanngillat. Taamaattumillu piffissami matumani innuttaasut qarasaasiatigut nunaminertamik atugassinneqarnissamik qinnuteqaasiorsinnaanatik, aammalu qinnuteqaatit tiguneqareersunik sullissisut suliarinninnissaminnut periarfissaqaratik.
Systemit qaqugorpiaq atoqqinneqarsinnaalissanersut ullulerneqarsinnaanngikkallarpoq.
Nunaminertamik atugassinneqarnissamut qinnuteqarusukkuit, qinnuteqarnissamut immersugassaq anillatseriarlugu immersoqquneqarpoq, kingornalu Teknikkeqarnermut Avatangiisinullu nassiullugu imaluunniit tunniukkiartorlugu.
Maniitsumi, Atammimmi, Napasumi Kangaamiunilu nunaminertamik atugassinneqarnissaq pillugu qinnuteqaatit apeqqutillu, man.otm@qeqqata.gl aqqutigalugu nassiunneqassapput.
Sisimiuni, Kangerlussuarmi, Itillimi Sarfannguinilu nunaminertamik atugassinneqarnissaq pillugu qinnuteqaatit apeqqutillu, sis.otm@qeqqata.gl aqqutigalugu nassiunneqassapput.
Nunaminertamik atugassinneqarneq pillugu annertunerusumik uani atuaasinnaavutit, qinnuteqarnissamullu immersugassaq aasinnaallugu:
https://pilersaarut.qeqqata.gl/nunaminertamik-atugassiissut-sanaartornissamullu-akuersissut/nunaminertat-atugassiissutit/
Pisortat serveriinik unamminartoqartitsinerup nalaani qarasaasiatigut qinnuteqarsinnaanerup aammalu nunaminertamik atugassinneqarnissamut suliamik suliarinnissinnaanerup qulakkeerneqarnissaanut, kommuni aaqqiissutaagallartussamik suliaqarpoq.