GIF aamma GAME Danmark ( https://game.ngo ) Qeqqata Kommunia suleqatigalugu Sisimiuni Maniitsumilu playmakerinik pilersitsipput.
Playmakercamp 1 ukioq kingulleq Sisimiuni Maniitsumilu immikkut ingerlannikuuarput inuusuttut namminneq kajumissusertik atorlugu meeqqanut 8-14-inik ukiulinnut sammisaqartitsisarusuttut pikkorissarlugit.
Playmakercamp 1-imi timersuutit assigiinngitsut pingasut (Aqqusinermi futsal, Aqqusinermi qitinneq aammalu niviarsiaqqanut sammisassat tulluarsakkat Game Girls Zone) atorlugit sammisaqartitsisarneq aammalu workshop playmakeritut maligassiuisuuneq pikkorissaassutigineqarput.
Ukioq manna playmakercamp 2-mi playmakerit tamaasa (Sisimiut Maniitsorlu ataatsimoortillugit) piginnaasaat ineriartorteqqinniarlugit Maniitsumi ingerlatitseqqittoqarpoq, ingerlannerani playmakerinngorusuttunut aamma ammatinneqarluni.
Meeqqanut sammisaqartitsinermi ataatsimoorfinni toqqissisimanartunik tamanullu peqataatitsisumik pilersitseqataanissaannut sammisaqartillugit. Camp 2-p ingerlanerani allannguutaapput workshopimi meeqqanut tunngatillugu atugarissaarneq/atugarissaannginnerlu (trivsel/mistrivsel) suunersut ingerlanneqarmata aammalu pinnguaatit assigiinngitsut ukiumut naleqqussarlugit misilittaatillugit.
Playmakercamp ulluni marlunni arfininngorneq nal. 9-18 aammalu sapaammi nal. 9-16 inuusuttut timersortarfimmi nerisassaqartinneqarlutik ataatsimoorfigaat. Inuusuttut playmakerioreersut aammalu playmakerinngorusuttut katillugit 40 tungaannut takkupput.
- Playmakerit assut pikkoripput, ukioq kingulleq aallarteqqaarneranniit massakkumut inuttut piginnaasatigullu siuariarsimanerat assut malunnarpoq. Sammisaqartitsinissap tungaatigut namminneq pinnguaatinik pilersaarusiorsinnaanerat, suleqatigiissinnaanerat sammisaqarnermilu aqutsisinnaassusaat takuneqarsinnaapput. Inuusuttut peqataasut siunissami kajumissutsimik suliaqarnerup silarsuaani neriunaateqarluarput, tulluusimaarnat! Neriuppugut kajumissutsimik suliaqarnertik nuannaralugu aallukkumaaraat, Apollonie Kreutzmann Qeqqata Kommuniani Timersoqatigiit Kattuffia suleqatigalugu Suliniutinut Siunnersorti.
Filmeeraliaq uani takuuk: https://fb.watch/i-i-8MTGIM/