Qeqqata Kommuniani kommunalbestyrelsi apriilip 27-anni ataatsimiikkami Maniitsumi bussinik ingerlatsineq kommunimit tiguneqassasoq aalajangiunneqarluni akuersissutigineqarpoq.
Isumaqatigiissut taamaatinneqartoq
Maniitsumi bussinik ingerlatsisut, Ice Cube ApS ataatsimeeqatiginerani paasinarsivoq bussinik ingerlatsinermut isumaqatigiissut isumaqatigiissutip naanerani taamaatinneqarnissaa kissaatigineqartoq. Ukiunilu tallimani sivisussusilimmik bussinik ingerlatsinissamut suliariumannittuussarsiuussinermi neqeroorutinik Qeqqata Kommunia tigusaqarsimanngimmat kommunip ingerlatsineq tigussallugu politikkikkut ataatsimiinnermi aalajangerneqarpoq.
Bussit nutaat kiassagaasumillu sanaartornissaq
Maniitsumi busseqarnissaq pillugu ikaasaarnissamut aaqqiissutissatut periarfissaasinnaasunik allaffeqarfik misissuivoq, bussinullu neqeroortitsinikuulluni. Bussinik ingerlatsinermik kommunip tigusinera sulisussanik atorfinitsitsinermik biilinillu inissiivimmik kiassagaasumik sanaartornissamik pisariaqartitsilernermik kinguneqassaaq.
Bussinik ingerlatsinissamut innersuussutigineqartut akuersissutigineqarput. Bussillu nutaat tikinnissaata tungaanut Sisimiuniit busseeqqat atorneqartussat Maniitsumut nassiunneqassapput.
Bussinut nutaanut marlunnut nassiussineq assartuinerlu qaammatit arfineq-pingasut tikillugit sivisussuseqarsinnaavoq. Maniitsumut bussit Sisimiuni busserineqartunit naannerusut pissarsiarineqassapput.
Ataatsimiinnermut imaqarniliaq tamakkiisoq nittartakkami atuarneqarsinnaavoq.