Immikkoortup ilaani 800-C15-imi Akiani umiatsiaaqqanut talittarfimmut nutaamut nunaminertamik atorneqanngitsumik saqqummiussisoqarpoq. Umiatsiaaraatilinnut talittarfimmut tassungalu umiatsianik qaqitsisarfimmut nunaminertamut atatillugu peqatigiiffimmut illumut sanaartorfissamik atorneqanngitsumik ilassutitut ataatsimik saqqummiisoqarpoq. Peqatigiiffimmut illu immikkuualuttumi 800-C15.3-mi annerpaamik 100 m2-mi ataatsimik quleriilerlugu sanaartorneqarsinnaavoq.
Peqatigiiffimmut illumut umiatsianut qaqitsisarfik sanaartorfissarlu ilanngullugit umiatsiaaraatilinnut talittarfimmut nunaminertamut atatillugu sanaartorfissagissaanermi akileeqataasoqassanngilaq. Kommunilli aqqusiniutaa immikkoortumut suli apissinneqanngilaq, taamaattumik aqqusinermik appakaaffissamik pilersitsinermi, sissami immiinermi nammineq aningaasartuuteqarnissaq kiisalu kissaatigineqassappat innaallagissamut imermillu pilersorneqarnermut aningasartuuteqarnissaq naatsorsuutigineqassaaq.
Piumasaqaatit makkua eqquutsittariaqarput, taamaanngippat nunaminertamut atugassiissut atorunnaassaaq.
- Peqatigiiffimmut ilumut umiatsianik qaqitsisarfik sanaartorfissarlu ilanngullugit umiatsiaaraatilinnut talittarfimmut nunaminertamik suliffeqarfiit/peqatigiiffiit kisimik qinnuteqarsinnaallutillu tunineqarsinnaapput. Inuit ataasiakkaat nunaminertamik tunineqarsinnaanngillat.
- Puttasut eqqaanni sineriak sinerlugu majuartarfiit pisuinnaallu aqqutaat ukioq kaajallallugu tamanit atorneqarsinnaatinneqassapput. Tamanna aamma ukiuunerani puttasut nunamiitinneqarneranni atuuppoq. Taamaattumik puttasunik paarnaarsisinnaaneq ima pissaaq, suli pisuinnaat aqqutaannut majuartarfinnullu kikkulluunniit appakaassinnaassallutik.
- Nunaminertamik atugassiissut atorsinnaassappat atuussinnaasappallu nunaminertamik atugassiinerup kingorna ukiup ataatsip qaanngiunneranni minnerpaamik puttasut marluk atorneqarsinnaalereersimassapput.
Piumasaqaatit qulaanniittut ilaat ataaseq malitsinneqanngippat, nunaminertamik atugassiissut atorunnaarsinneqassaaq.
Aalajangersimasumik piffissaliussap iluani peqatigiiffiup illuutaanut sanaartorfissaq atorneqaleersimanissaanik piumasaqaateqanngilaq.
Umiatsiaaqqanut talittarfiup inissisimaffia nunap assingani takuneqarsinnaavoq. 2012-imiit 2024 tungaanut Qeqqata Kommunianut kommunip pilersaarusiorfigineqarnerani tapiliussaq nr. 19-imi aalajangersakkat immikkoortup ilaanut 800-C15-imut atuuttuupput. Kommunip pilersaarusiorfigineqarnerani tapiliussaq, nunap assingi allat il.il. kiisalu qinnuteqarnissamut periuseq uani www.qeqqata.gl aamma https://pilersaarut.qeqqata.gl/-imi takuneqarsinnaapput.
Peqatigiiffimmut illumut umiatsianik qaqitsisarfik sanaartorfissarlu ilanngullugit umiatsiaaqqanut talittarfik saqqummiunneqartoq 2023-mi aggustip aallaqqaataani atorneqarsinnaalissasoq naatsorsuutigineqarpoq.
Nunaminertamik inniminniinermut qinnuteqaammut ilanngunneqassapput:
- Umiatsiaaqqanut talittarfimmut eqqarsaataasumut qaqugu aallartittoqarnissaanut qaqugulu naammassereersimanissaanut piffissatut pilersaarut.
Qinnuteqaatit paasissutissanik taamaallaat taamaattunik imaqartinneqartut ilaatinneqassapput. Qinnuteqaat naammattuunissaa eqqortumillu paasissutissinissaa qinnuteqartup nammineq akisussaaffigivaa.
Paasissutissanut, uppernarsaanissamut qinnuteqarnerullu ingerlanneqarnissaanut piumasaqaataasunut nalornissuteqarpiit paasissutissanilluunniit sukumiiinerusunik pisariaqartitsisoqarpat, Sisimiuni Teknikkeqarnermut Avatangiisinullu immikkoortortamut saaffiginnittoqarsinnaavoq.
Nunaminertamik inniminniinissaq pillugu qinnuteqaat Qeqqata Kommunianut, Teknikkeqarnermut Avatangiisinullu immikkoortortaq, Postboks 1014, 3911 Sisimiut-nut tunniunneqassaaq. Qinnuteqaatit 2023-mi ataasinngorneq juulip 17-iani nal. 15 tiguneqarsimasut piffissaq eqqorlugu tiguneqarsimasutut isigineqassapput.
Qinnuteqaatit piffissaq eqqorlugu tiguneqartut tamarmik ataatsikkut tiguneqartutut isigineqassapput. Qinnuteqartut piukkunnaatillit arlaliussappata, agguataarineq makitsinikkut aalajangiiffiussaaq.
Qinnuteqarnissamut piffissaliussap naanerata kinguninngua sapinngissamik piaartumik agguataarineq makitsinerlu ingerlanneqassapput.
