Paneeraq Olsen suliassaqarfimmut kommunillu ingerlanneqarneranut ilisimasaqarluarpoq misilittagaqarluarlunilu. Atorfinittussanngornera Qeqqata Kommuniani pisortaanerup nuannaarutigaa.
- Qeqqata Kommuniani suleqatigeqqittussanngoratsigu nuannaarutigaarput qilanaareqaarpullu, Qeqqata Kommuniani pisortaaneq Juliane Henningsen Heilmann oqarpoq.
Paneeraq Olsen maanna kommunalbestyrelsimi Inatsisartunilu ilaasortaavoq, ilisimaaraali Atugarissaarnermut pisortaanertut atorfik partiimut attuumassuteqarani atorfiusariaqartoq, taamaammat aalajangersimavoq atorfik namminerminut tunniunneqarpat politikki qimanniarlugu.
Paneeraq Olsen allaffissornikkut qaffasissumik ilinniagartuujuvoq, atorfiillu qaffasissut assigiinngitsut
suliffigereerlugit misilittagaqarluarluni, soorlu kommunimi pisortaanerusimanermini aamma ilaqutariinnermut immikkoortortaqarfik akisussaaffigisimallugu aammalu qinikkatut kommunalbestyrelsimi, Meeqqanut, Inuusuttunut Ilaqutariinnermullu Naalakkersuisutut kiisalu Inatsisartut Ilaqutariinnermut Peqqissutsimullu Ataatsimiititaliaani ilaasortatut suliaqartarsimanermigut aqutsinikkut inulerinermilu pissutsit ilisimaarilluarlugit.
Atorfeqarnermini sulisut pitsaasunik sakkussaqarnissaat, siunnersorneqarnissaat, atugaqarnissaat, sinaakkuteqarnissaat aammalu pikkorissartarnissaat ilinniagaqarnissaallu pingaartillugit suliniarpoq, taamaaliornikkut innuttaasut pitsaasumik pilertortumillu sullinneqarnissaat anguneqarsinnaammat.
Paneeraq Olsen juulip aallaqqaataa aallarnerfigalugu atorfinissaaq.
