Sisimiuni innuttaasut tusaamasat malillugit atsersorneqassappaat, kalaallit nunaata pinngortitaa nassuiassavaat, kulturitta arlaannut attuumassuteqassappaat allarujussuarnulluunniit tunngallutik? Illit siunnersuuteqarsinnaanngorputit aammalu kingusinnerpaamik sisamanngorneq 24. august 2023 tusarfigerusuppatsigit. Siunnersuutitit e-mailimut plan@qeqqata.gl imaluunniit nalinginnaasumik allakkatigut nassiutikkit uunga: Qeqqata Kommunia, Teknikkeqarnermut Avatangiisinullu Immikkoortortaq, Postboks 1014, 3911 Sisimiut.
Augustip 24-ata kingorna aqqusinernut atit sorliit atorneqassanersut kommunalbestyrelsi inaarutaasumik aalajangiissaaq. Siunnersuutit tiguneqarnikut ilaat akuersissutigineqarpata, soorunalimi aqquserngup atia siunnersuummilluunniit ajugaasuusumik nassiussinikuusoq inuk maani Sivdlek` aqqutigalugu tamanut saqqummiutissavarput.