Arfininngornermi marsip 9-anni Sisimiut katersortarfianni Qeqqata Kommuniani pitsaaliuinermik suliaqartut Hotel Søma peqatigalugu ilaqutariinnut nuannisaartitsinerminni innuttaasunit peqataaffigilluarneqarpoq.
- Pitsaaliuinermi pingaartipparput innuttaasut kikkulluunniit ornissinnaasaanik aaqissuissalluta, taamaammat una kikkunnulluuniit ammasumik aaqissuusarput peqataaffigineqarnera pingaarueqarpoq, pitsaaliuinermik siunnersorti Nuka Olsen oqarpoq.
Sisimiut katersortarfiani ilaqutariinnut nuannisaartitsinermi pinnguaatinik soorlu Kalahanik, Partnersinik, meeqqanut sammisassanik allanillu pinnguaatertoqarpoq.