Qeqqata Kommuniani suliniut kommunalbestyrelsimit akuerisaasoq Akisussaaqatigiitta, ineriartorteqqinneqarpoq taallugu Peqqinneq Inuunerinnerlu. Akimortumik suleqatigiinnut tamanut suliniutip aaqqissuuteqqinneqarnera pillugu isumasiortitsinissaq pingaartinneqarpoq, taamatullu innuttaasunik ikiortiserinnilluni isumasioqateqarnissaq.
Sisimiuni innuttaasunik katersortarfimmi isumasiortitsinissaraluaq februaarip 26-anni pisussaagaluaq innuttaasunik aggertukippallaarnera peqqutigalugu kinguartinneqarpoq, piffissamilu qaninnermi ullulerneqaqqikkumaarluni.
- Uggornaraluartumik innuttaasut ikittuinnaat isumasiortitsinissamut takkupput, neriuppugulli tullissaani peqataasoqarluarumaartoq, innuttaasummi amerlanerpaat peqqinnerulerlutillu inuunerinnerulernissaat angussagutsigu tamaavitta akisussaaqatigiilluta kivitseqatigiittariaqarpugut, Qeqqata Kommuniani borgmesteri Malik Berthelsen oqarpoq.
Pingasunngornermi februaarip 28-anni pisortaanerup sulisuisa peqatigiillutik Qeqqata Kommuniani Sisimiuni susassaqartunut suliniutip aaqqissuuteqqinneqarnera saqqummiuppaat, tamanna aamma qinikkanit Sisimiuniittunit peqataaffigineqarpoq.
- Kommunitsinni sulisut isumaat tusarlugit pissarsinarpoq, susassaqartut piginnaasat sakkussaallu atorluarlugit kivitseqatigiinnissaq anguniagaraarput. Kommunitsinni susassaqartut tamaasa isumaat tusarusuppagut. Suleqatigisartakkavummi taakkuupput, piviusunngortitsissaguttalu immitsinnut pinngitsoorsinnaanngilagut, Atugarissaarnermut ataatsimiititaliami siulittaasoq Juliane Enoksen oqarpoq.
Maniitsumi marsip 20-anni susassaqartunik isumasiortitsisoqarpoq, innuttaasunullu peqatigiiffinnullu marsip 19-anni aamma isumasioqatigiisitsisoqarluni. Qeqqata Kommuniani nunaqarfiit aasaru tikillugit susassaqarfinni sulisut innuttaasullu isumaat tusarniarneqassapput.
- Innuttaasut kommunitta ingerlanera pillugu paasisaqarnerorusuttarput, uagullu sulinerput qanoq pitsaanerusinnaanersoq pillugu innuttaasut isumaat assut tusarusuppavut. Uanilu suliniummi Akiussaaqqatigiittami innuttaasut, suliffeqarfiit, peqatigiiffiit inuiaqatigiinnilu susassaqartut tamaasa assut suleqatigerusoqaagut, Atugarissaarnermut ataatsimiititaliami siulittaasoq Juliane Enoksen oqarpoq.
Maniitsumi innuttaasuut soqutiginnillutik isumasioqatigiinnermi peqataalluarput, taammatullu Maniitsumi susassaqartunut suliniutip saqqumiunnerani peqataalluartoqarluni.
Isumasiuinermi sulisut, innuttaasut suliffeqarfiillu isumaat katersorneqassapput taakkulu aallaavigalugit suliniutip atuutsinneqalersinnagu tunngavinnut ilanngunneqassallutik.