Nunaqqatigiinnut kaffillerneq ualikkut ataatsiniit sisamap tungaanut ingerlanneqarpoq, meeqqat pissaqartinneqarlutik.
Aggertut kaagitorlutillu kaffisuinnanngillat, asserpassuimmi toqqortaasimasut misissuataarneqarput. Ilai imminnut takupput, ilaquttat mikisuuneri allaallu angajoqqaat aanaa aataakkut ilisarineqartarlutik.
Isaasoqarluarpoq, sulisuusimasut, paarlattaasimasut meeraatigisimasat angajoqqaajutigisimasallu assigiinngitsunik eqqartuillattaarput.
- Meeqqeriviup ukiuni 60-ni ingerlanerani sulisuusarsimasut maanna allamut nuussimasut, soraarninngorsimasut aammalu toqukkut qimagussimasut qujassuteqarluta eqqaammavagut, Albrichtine Lynge meeqqerivimmi aqutsisoq oqarpoq nangillunilu;
Minnerunngitsumillu meerarpassuit angajoqqaat sulinerini paaqqutarineqartarsimasut ilikkagassanillu assigiinngitsunik peqqussutit, malitassallu najoqqutaralugit sulisunit aalajaatsunik aallunneqarsimaneri pillugit qujassutissaqaqaagut.
Unnukkut sulisut, aappaat nunaqarfimmilu aqutsisut nereqatigiipput.