Saviminilerinermik ilinniarfimmik KTI-imut atasumik nutaamik pilersitsinissaq kommunitsinnut Sisimiunullu annertoorujussuarmik pitsaasumik sunniuteqartussaavoq. Tassami suliffiit ilinniartullu nutaat taakkualu ilaqutaat pinngitsooratik nuannersumik malunnaateqartussaapput.
Siunissaq ungasinnerusoq eqqarsaatigalugu isumaqarpunga Naalakkersuisut taamatut aalajangernerat silatusaarnerullunilu eqqortuusoq, tamannalu pillugu Naalakkersuisut nersualaarlugillu qutsavigaakka. Tassami ilinniartitanerit minnerpaamik suli ukiuni 100-ini atasussaapput. Taamaattumik ilinniarfiit imminnut assingusut kattunneqarnissaannik Naalakkersuisut aalajangernerat nunatsinnut ilinniarfeqarfinnullu pitsaanerpaasussavoq.
Suliaq sivisuumik ingerlanneqartussaagaluartoq sanaartornerup aallartinneqarnissaanut nutaanillu nunaqqatitaarnissatsinnut qilanaarpugut.