Ataasinngornermi juunip pingajuanni nalunaaqqutaq 9:00 Sisimiuni Minngortuunnguup Atuarfianni atuartut ingerlaaqqatigiillutik kommunip illorsuata silataanukarput, meeqqat nuannataarlutillu tipaatsullutik nipilersuummik tusarnaartinneqareermata, Borgmesteri Malik Berthelsen, meeqqap nipaa qanoq pingaaruteqartigisoq pillugu ilaatigut ima oqaaseqarpoq.
- Nammineq oqariartuutigerusutasi meeqqaat ulluanni imaluunniit Nakuusa aqqutigalugu apuuttakkasi allatuulli, soorlu sulisartut, piniartut, ilinniartitsisut kattuuffiisullu pingaaruteqartigipput, Malik Berthelsen ilaatigut taama oqarpoq.
Borgmesterip oqaaseqarnermini ilaatigut kaammattuutigaa meeqqat ikinngutigiinnut peqqinnartumik ataatsimoorfiusunut peqataalluartarnissaq internetsimillu atuivallaannginnissaq pingaartinneqaruni tarnikkut timikkullu peqqissutsimut pitsaasuusoq.
Borgmesterillu aamma meeqqanut erseqqissaatigaa atuarfimmi naalannerup inortuinanilu atuariartortarnerup qanoq pingaaruteqartigineranik.
Qeqqata Kommunia aamma kommunabestyrelsi sinnerlugu Borgmesterip meeqqat tamaasa meeqqat ulluanni pilluaqquai.