Sisimiuni Maniitsumilu nutaanik kuuffissualersuinermut ukiumut 6mio.kr. missingersuutini immikkoortinneqartarput. Siusinnerusukkullu suliat aallartinneqarsimasut ukioq manna nanginneqarlutillu inaarsarneqassapput. Sisimiuni massakkut nanginneqarlutik suliarineqartut tassaapput, Jaakunnguup aqqusernga aamma Kunuuteralaap aqqusernga.
Maniitsup kitaatungaani pingaarnertut kuuffissuarnik nutaanik suliaqarneq 2022-imi aallartinneqartut immikkoortoq 1 (Unnuartuumut) aamma immikkoortoq 2 (Pelikaat) naammassineqareersut nangillugit immikkoortoq 3 (Pelikaat) aamma immikkoortoq 4 (Minneralak) tullinnguullugit ukioq manna suliarineqassapput.
Sisimiuni pilersaarutit malillugit tullinnguullugu aappaagumiit Berthelsenip aqqusernga kuuffissualersorneqarnissaa ukioq manna augustimi suliariumannittussarsiuunneqassaaq. Taamaasilluni naammassineqariarpat Berthelsenip aqquserngani najugaqarfiit 34-it attavimmut nutaamut attavilerneqarnissaat periarfissaalissaaq.
Imermik mingunnikumik pilersaarut naapertorlugu Sisimiuni Maniitsumilu najugaqarfiit tamakkerlugit 2030-imi kuuffissuarnut attaveqalersinnaanissaat anguniaagaavoq.