Københavnip aamma Kangerlussuup akornanni nunat assigiinngitsut akornanni 2025-mi suli timmisartuussiinnaarnissaq ingerlanneqassasoq aasap ingerlanerani Albatros aamma Air Greenland aalajangiipput. Nutaarsiassat nuannersorujussuupput. Ingerlatseqatigiiffiit marluusut suliniutaannut suleqatigiinnerannullu qutsaviginiarpakka.
Tassunga atatillugu Mittarfeqarfiit/Greenland Airports Kangerlussuarmi nunat assigiinngitsut akornanni timmisartuussinissamut periarfissiinerannut qutsaviginiarpakka. Kangerlussuarmit Københavnimut nunat assigiinngitsut akornanni timmisartuussisinnaaneq Albatros aamma Air Greenland kisimik iluaqutiginngilaat, Kangerlussuarmili inissisimaneq Mittarfeqarfiit allat aamma atorluartarpaat.
Kangerlussuarmi takornariat akornanni angalasut paarlaanneranni soorlu atorneqartartoq, tassani takornariat umiarsuaannit attartukkanik timmisartuussinernilu ilaasut paarlaattarput. Amerikkarmiut Semersuarmi ilisimatusartunik pilersuinermi aamma iluaqutigisarpaat. Imarpik avannarleq qulaallugu timmisartut mikisut arlallit ingerlaarnerminni mittarfimmik isumannaatsumik atorfissaqartitsisut aamma iluaqutigisarpaat.
Illersornissamut ministeriaqarfiup Naalakkersuisullu akornanni Kangerlussuaq pillugu isumaqatigiissut nutaaq
Aasap ingerlanerani Illersornissaqarfiup Kangerlussuarmi mittarfimmik ukiut pingasut atuuttussatut isumaqatigiissutaagallartumik atuinermut akiliuteqartarnissaa pillugu Illersornissamut ministeriaqarfik Naalakkersuisullu isumaqatigiissuteqarput. Nutaarsiassat pitsaasuupput. Isumaqatigiissutip Folketingip Aningaasaqarnermut ataatsimiititaliaata ukiup ingerlanerani akuersissutigissagaa piumasaqaataagaluartoq, tamanna pisussanut aallarniutaasoq naatsorsuutigaara.
Illersornissamut ministeriaqarfiup Naalakkersuisullu akornanni ungasinnerusumut isumaqatigiissusiortoqarnissamut qilanaaruteqarneruvunga, taamaalilluni Kangerlussuup siunissaa innuttaasunut, inuussutissarsiuteqartunut aamma Qeqqata Kommunianut qularnarunnaarniassammat. Tamassuma qanittukkut pisinnaanissaa neriuutigaara.
Kangerlussuarmut politikkikkut tapersersuineq
Aasap ingerlanerani Kangerlussuarmi nunat assigiinngitsut akornanni timmisartuussissarnerup ingerlaannarnissaa ilaatigut isornartorsiorneqarpoq.
Isornartorsiuisuniit isumalluarneruvunga. Tassami Kangerlussuup Sisimiullu akornanni aasap ingerlanerani cykelinik kanomik pisummillu ingerlaarsimasuniit tusartarparput nunarujussuup qanoq periarfissagissaartiginera. Taamaattumik nunatta avataaniit toqqaannartumik Kangerlussuarmut timmisartuussisoqartuaannarnissaanik aalajangerneq assorujussaq nuannaartutigivara.
Kangerlussuup siunissaa pillugu suleqatigiissitamiit nalunaarusiap, Namminersorlutik Oqartussanit nunallu immikkoortuanit peqataaffigineqartup aammattaaq inerniliuppaa "Kangerlussuarmi Mittarfik pingaaruteqartoq nunallu immikkoortuani ornitassatut inissisimanera ineriartuutaassasoq", pingaartillugulu ilassutigalugu "kalaallit nunaanni mittarfiit marluusut avataanilu mittarfiup ataatsip akornanni pingasoqiusamik timmisartuussisarneq" periarfissaammat.
Taamaattumik 2011-mi Assartuussinissamik isumalioqatigiissitarsuup isumaliutissiissutaanit aammalu 2018-imi mittarfissuarnut inatsisip akuersissutigineqarnerani tunngavilersuutigineqarsimasunit ullumikkut Naalakkersuisut allaanerusumik isumaqarlutik ineriartortitserusuttunut tapersersuinerat upperinninnerallu pillugit nersualaarusuppakka.
Ineqarnermut Attaveqaasersuutinullu Naalakkersuisoq Hans Peter Poulsen, isumaqatigaara killilersuinikkut ineriartortoqarsinaannginneranik, periarfissalli atorluarnerisigut ineriartorneq upperalugu oqaatigimmagu.
Piffissat periarfissallu nutaat
Kangerlussuarmi piffissaq periarfissallu nutaanngorput. Aasaq sioqqullugu Kangerlussuarmi Issittumi Tunngaviusumik ilinniarfik ammarpoq imalu ingerlalluartigaaq, ukiup tulliani annertusineqassalluni amerlanerusunillu ilinniartunik tigusaqassalluni.
Aasap kingorna oktobarimi Sisimiut Kangerlussuullu akornanni ATV-inut aqqut ammarneqassaaq. Tamanna innuttaasunut, takornarissanut ilisimatusartunullu nutaanik periarfissiissaaq. ATV-inut aqqutip periarfissarpassuinik nunatsinnit nunattalu avaataaneersunik atuerusuttunit saaffiginnissutinik amerlasuunik pissarsisarpugut.
Kangerlussuarmi innuttaasut inuussutissarsiortullu siunissaq pillugu neriuuteqarnerulersimasut aamma malugisinnaavara. Nalunngilara Nuummi mittarfiup ammarneranut atatillugu Kangerlussuarmiut ilaat nuuttussaasut. Kangerlussuarmi innuttaasunut - Kangerlussuarmit nuuttussanut, najugaqaannartussanut takkuttunullu - naammagittangaarnissinnut qujamasuppunga.
Isumaqarpunga ukiut siuliini siunissarput pillugu ernumassuteqarsimanerput ullumikkut isumalluarnermik taarserneqarsimasoq. Qilanaaqaangalu periarfissat nutaat takkunnissaannut!¨