Aasaanerani suliffissarsiortut ikilisarnerat nalinginnaasuuvoq. Ukioq mannali juulimi suliffissarsiorlutik allatsissimasut ukiut siuliinut sanilliullugu malunnaatilimmik appasinnerupput, siorna juulimut sanilliullugu 80-inik ikileriarsimallutik.
Tamanna ilaatigut suliffissarsiortunut ikiorsiissutit pillugit Inatsisartut Inatsisaata nutaap atuutilerneranik aammalu aalisarnerup sanaartornerullu ingerlalluarneranik patsiseqarpoq.
Sisimiuni suliffissarsiortut siornamut sanilliullugu annertunerpaamik ikileriarlutik 142-iniit 74-inut ikileriarsimapput, procentinngorlugu appariaat 48%-ulluni. Kangerlussuarmi, Sarfannguani, Kangaamiuni Napasumilu suliffissarsiortut taamaallaat 1-3 akorngani amerlassuseqarput.
Suliffissarsiortut taamak ikitsiginerat borgmesterimit Malik Berthelsenimit nuannaarutigineqarpoq;
- Sulisinnaasut amerlanerpaat sulinerat soorunami nuannaarutigaara. Isumaqarpungalu kommunitsinni assigiinngitsunik pisoqarluarnera ingerlalluartoqarneralu tamatumunnga takussutissaasoq. Tamatumunngalu Namminersorlutik Oqartussat suliffeqarfiillu namminersortut sanaartornermi suliassaqartitsilluarnerannik, innuttaasullu suleqataasut tamaasa kommunalbestyrelse sinnerlugu qutsavigalugillu nersualaarpakka, borgmester Malik Berthelsen, oqarpoq.
Borgmester Malik Berthelsenilli ilanngullugu erseqqissaatigaa suliffeqarfippassuarni sulisussanik annertuumik amigaateqarneq ajornartorsiutaanera, taamaatumillu ilungersortumik kaammattuutigalugu inuusuttut sulisinnaasut tamarmik inuiaqatigiinni akisussaaqataanerminnut peqataanissaat pingaaruteqartoq.