Qulequtaq “massakkumiinneq” sammineqarpoq taassumap aqqusaarsinnaavai oqaatsit atorlugit timeq tarnilu pinngortitamut atassuteqarnera, avatangiisit suleqatiginerani, angajoqqaallu suleqatigiinneri aamma kulturikkut avitseqatigiinnerit. Islandimiit meeqqerivik Gefnarborg, Savalimmiuniit meeqqerivik Dagstovnurin Sólareygad kiisalu Sisimiuni Meeqqerivik Naja Aleqamiit Sisimiuni ulluni pingasuni naapeqatigiipput.
- Malunnartumik tamatta oqaatsigut eriagisaraagut, Islandimiut unamminartoqartippaat tuluttut oqaatsit inituninngulermata. Savalimmiormiut unamminartoqartippaat qallunaat oqaasii initummata, uagullumi aamma oqaatsigut eriaginissaanut unamminartoqartillutigu. Utoqqaat meeqqallu peqatigiinnerat, oqaatsit pillugit kulturikkullu pissutsit meeqqeriveqarnerup perorsaariaatsillu tungaatigut avitseqatigiissutigalugit eqqartukkatta ilagaat, Meeqqeriviit allaffianni pisortaq Navarana Lennert-Andersen oqarpoq.
Naapeqatigiinnermi siunertaavoq nunat taakku pingasut iluanni sapinngisamik ukiuni arlaqartuni suleqatigiilluarnissaq avitseqatigiittarnissarlu. Siunissami tulliuttutut sulisut marluk sisimiuneersut Islandiliarlutik taamatuttaaq Savalimmiunut meeqqerinermut meeqqeriveqarnermullu tunngasunik kultorikkut paasisassarsiorneq immersueqatigiinnerillu anguniagaassapput. Pissarsiallu Qeqqata Kommuniani meeqqerivinni sulisunut tamanut siammartarnissai siunertaalluni. Nordplus Junior aningaasaliisuuvoq.