Nordjobb nunani avannarlerni inuusuttunut ukiup ilaannaani sulerusuttunut aaqqissuisartuuvuq, taannalu aqqutigalugu 25-nik ukiulik danmarkimeersoq Olga Nørager-Nielsen meeqqerivimmi Sisimiuniittumi Nattoralinnguami inimi 3-niit 4-mat tungaannut ukiulinni meeraqartumi sulivoq. Kalaallit Nunaat takorusuttuartarinni Olgap oqaatigaa.
- Danmarkimiilluni Kalaallit Nunaat pillugu paasissutissiinnerit annikitsuaraapput soqanngilarluunniit, taamaammallu nuan ”takorluugaanaalluni”. Piviusulersaarutini assinilu kisiat takorusunngilara, ornillugu misigerusuppara taamaammat Kalaallit Nunaat toqqarpara.
Olga meeqqerivinni sulilluni misilittagaqarfigereerpaa, maanilu sulinera nuannaraa oqaatinillu assigiinngitsunik ilikkagaqareersimalerpoq.
- Siullertut naamik, aap, tassa oqaatit ilikkarpakka. Ikiu, inaanut, qaakkit, maani, qujanaq, allallu oqaatsit naatsut ulluinnarnilu atorneqarnerugunartut ilikkalertupallappakka. Nuannaraaralu oqaaseq sunaana? Ilikkarakku, taamaalillunga meeqqap saaffigigaanganinga taanna atornerusarpara attaveqaqatigiinnerlu aallartittarpoq, aamma timitsinnik oqaluttaqaagut soorlu ussersornikkut Olga illalaarluni oqarpoq.
Nattoralinnguaq 64-inik meeraqarpoq 15-inillu sulisoqarluni, meeqqeriviup pisortaata nuannaarutigaa, Olga taammak periarfissaqarluni meeqqerivimmut suliartorsinnaammat.
- Olga sulilluartorujussuuvoq takkuttuaannarlunilu, angajoqqaat meeqqallu attaveqarfigilluaqai. Aamma oqaatsit tungaatigut nalornissuteqaraangami uagutsinnut saaffiginnittarpoq. Siunissami allat taamma misileerusuttut aamma maanga tikilluaqqusaapput, Meeraateqarfik Nattoralinnguami pisortaasoq Dorthe Nathansen oqarpoq.
Nordjobb pillugu paasissutissat:
Norjobb-ip siunertarivaa inuusuttut Nunani Avannarlerni nuttarsinnaanerat annertusassallugu Nunanilu avannarlerni suliffeqarnerup iluani nukittorsaaqataallutik. Oqaatsit piorsarsimassuserlu pillugit ilisimasat Nunani avannalerni Nordjobb-ip annertusarpai. Siunertarisaq 1985-imi pilersinneqarpoq taamanimiillu inuit 29.000-it suliffittaartissimallugit.
Uani paasisaqarnerugit: