Eqqaassutissamik inussulioqatigiinneq

Sapaammi oktobarip 20-anni Kangerlussuarmi innuttaasut ataatsimut eqqaassutissamik qujassummik inussulioqatigiipput. Sumiiffik nalunaaqutserniarlugu ujaqqat assigiinngitsut ataasiakkaartut qaleriiaarlugit inussuk sananeqarluni, kinaluunniit ujaqqamik nutaamik qaavanut ilisisinnaavoq, taamaasillunilu inussuk alliartorteruusaarneqarsinnaalluni.

- Sulisorpassuit, nunaqqatit ilaqutaasullu nunannguaq uummateqarfigilluagarput qimattussanngorparput. Tassungalu atatillugu takorloorsimavara innuttaasunut piumasunut tamanut ataatsimoorussamik "eqqaassutissannguamik/qujassutissannguamik" inussummik sanasoqarnissaa. Nalunngisatsituut nunaqqatigut ilai Ilulissiartussaapput ilaalu Nuummut nutsertussaapput, taakkulu nunannguarlumi manna qamuuna uummatitsinnut toqqortarilertussaavagut, aaqissuussinermi ataqatigiisaarisoq Aningaaq Heilmann oqarpoq.

Kangerlussuaq atlantikoq ikaarlugu mittarfittut atorunnaarluni Nuuk atuutilertussaammat Kangerlussuarmi innuttaasut assigiinngitsuni sulisuusut suliffitsik peqqutigalugu illoqarfinnut allanut nuussortariaqalernerat peqqutaalluni inussuk eqqaassutissatut sananeqarpoq. Kinguneranilu nunaqarfimmi aqutsisut aaqissugaannik Kangerlussuarmi multihusimi ataatsimoorluni kissartunik najoqqaaqqatigiittoqarluni.