Qeqqata Kommunia Kilaaseeqqap Atuarfianik nutarsaaneq aallartippaa

2027-mi juunimi tunniuttussanngorlugu nutarsaalluni suliassat 2024-mi decembarimi aallartinneqassapput. Nutarsaaneq ilaatigut isaterinermik aamma nukarlerni akullernilu atuartunut illup immikkoortuanik nutaarluinnarmik sanaartornermik, ruujorinut innaallagissamullu aqqutinik nutaanik kiisalu atuarfik tamakkerlugu illup iluanik isaterinermik taarsersuinermillu ilaqassaaq. Kilaaseeqqap atuarfianik nutarsaanikkut Atuarfitsialammut najoqqutassat naapertorlugit atuarfik ininik atuartitsivinnik nutaaliaasunik atoruminartunillu peqalissaaq.

Atuarfimmik sanaartornermut ataatsimiititaliaq Atuarfiup siulersuisuinik, ilinniartitsisunik- aamma atuartut sinniissaannik kiisalu atuarfiup aqutsisuinit inuttaqartoq suliniummik ilusilersuinermut immersueqataanikuupput. Masanti A/S pilersaarusiortuullunilu siunnersuisuuvoq. Kommunalbestyrelse nutarsaanissamut katillugit 146 mio. kr.-inik immikkoortitsinikuuvoq-.

”Kilaaseeqqap atuarfianik nutarsaaneq maannakkut aallartissinnaagatsigu nuannaarutigisorujussuuarput taamaalilluta Maniitsumi atuartitsinermi pissutsinik kiisalu sulisunut atuartunullu sulinermi atugassanik pitsanngorsaanermut tunngatillugu pingaarutilimmik angusaqarpugut" taamak oqarput Teknikkimut Avatangiisinullu Ataatsimiisitaliap siulittaasua Nivi H. Efraimsen aamma Ilinniartitaanermut Ataatsimiisitaliap siulittaasua Evelyn Mølgaard.