Kalaallit Nunaanni angerlarsimaffinni ukiut tamaasa ikuallattoqartarpoq. Ajoraluartumik suli amerlasuut angerlarsimaffimminni putsumut kalerrisaaruteqanngillat, naak taanna inuunermut sillimmatini akikinnerpaajugaluartoq. Putsumut kalerrisaarummik pisinissaq isumarsiatsialaavoq annertuumik sunniuteqarluarsinnaasoq.
Putsumut kalerrisaarut ikuallattoqarnerani kalerrisaarutaavoq, pinaveersaartitsiniutaanngilarli. Ikuallattoornissamut annikilliliisoqarsinnaavoq siunnersuutit ajornanngittuaqqat malinnerisigut:
-Ikuallannerit amerlanersaat igaffimmi imaluunniit naneruutinik atuinermik aallartittarput. Taamaattumik juullip nalaanni taakku immikkut eqqumaffigikkit. Atortut kissarsuutip qaavanut ilinngisaannakkit, igatillutit igaffimmiiginnarit naneruutillu qamittakkit inimiit ingerlagaangavit.
Sooruna putsumut kalerrisaarut?
Ikuallattoqartillugu pujoq qummukartarpoq. Putsup qilaaq nallerpagu putsumut kalerrisaarut nalunaarsuinissaanut periarfissaq pitsaanerpaavoq. Putsumut kalerriutip kalerriisinnaanera annikillisarput qilaanut ilinagu appasinnerusumut inissinneqarpat. Assersuutigalugu iikkami nivinngarneqarsimappat imaluunniit skaaviup qaavani ilineqarsimappat, taava pujuliortoqangaatsiaqqaartariaqassaaq kalerrisaarutip kallerisaarilernissaanut.
Angerlarsimaffinni ataatsiik arlalinnilluunniit putsumut kalerrisaaruteqareeraluaruit imaassinnaavoq atorsinnaanngitsut. Sapaatiuppat misissussavatit ilumut atorsinnaanersut.
-Putsumut kalerrisaartutit atorsinnaanngitsut toqqissisimatitsivinneq ajorput. Taamaattumik akulikittumik misissortassavatit. Batterit ajunnginnersut, kalerrisaarutit salinneqarsimanersut kalerrisaarutillu ”qaangiuuttoorsimannginnera” qulakkeeriuk, Kalaallit Nunaanni Upalungaarsimasut kaammattuipput.