Ammartagaq siulleq - Emma Jensen

Meeraaninni juulleriartornera aamma juulli qanoq eqqaammasaqarfigaagit?

Qullissani meeraavunga juullimi ullaakkut anaanama naneruutit ikitereersimasarpai, qullortitartortuaannaratta pisarnertut nerisarpagut saniatigut kakaavisunni naasagara puujuikkiunnikuuara kaageeqqallu tikki tipigittaqaat. Ullaakullu poortukkanik ammaaneq, atisassaqarluta nutaannik juullimilu atugassatsinnik. Naalagiarnissatsinnut anaanatta nujagut perlaartarpai aappaluttumillu qalersalerlugit. Unnukkut aqissit juullip mamartui ataatap pisaavi anaanama igakkut siattarpai, mmh! Buddingimik kinguleqquttarpugut anaanama paarmanik miseqqiaannik miseqqerlugu, juulleriartornera Qullissani nuannertaqaaq.

Sisimiuniilereerluta juullimi qatanngutigiiulluta illoorariiaallutalu immitsinnut pajuttortaattarpugut qanittuarakasiugatta, unnukkullu meerarpassuulluta silatangiaasarpugut.

Ullumikkut juulli qanoq atortarpiuk?
Juulliaqqami uagutsinniittarpugut, nerisagut ima allanngorsimatigaat qeerlutoortuuttarpugut ris a la mandillu eqqugassalerluta kinguleqquutigisarlutigit. Juulli eqqissiivillunga atorusuttarpara.

Tamannguassi juullisiorluarnissassinnik kissaappassi.


Inoqatinnut siunnersuutitsialaat pingasut suut tunniukkusuppigit?

Inoqatikka siunnersorusuppakka:

• Peqqitsillusi pisussinnaatillusi pisuttuartaritsi, timi aalatiguk inuummarinnaqaarmi.

• Nerisagut paarilluartigit, peqqinnartunik nerisarit, sukkoqarpallaanngitsunik.

• Meerannguit nuannaartittarsigit, pingaaruteqarput taakkunnguit, inersimasutuulli uummateqarput, meerannguasi paarilluarsigit.