Aappariit Marianne aamma Hans Nielsen ukiuni arlalinni qasujaallutik soqutiginnillutillu meeqqanik paarsisartuunertik aammalu meeqqat angerlarsimaffimmut eqqunneqartut asanninnermik annertuumik, kissalaamillu misigitillugit tikilluaqqusiuarnerat pissutigalugit, nersornaaserneqarput.
- Meeqqanut pisariaqartitsisunut ikiuerusussuseqarnersi kommunitsinnut assorujussuaq pingaaruteqarlunilu isumaqaqaaq, tamatsinnullu maligassiuisuunersi suliasilu imaannaanngitsut pillugit kommunalbestyrelsep ukiumoortumik innuttaasunut nersornaasiuttagaat ilissinut tunniunneqassasoq aaliangiunneqarpoq, Borgmesteri Malik Berthelsen oqarpoq.
Ukiuni arlaqalersuni ilaqutariit meeqqanik paarsiartuusut Marianne aamma Hans Nielsen innuttaasutut nersorneqartut saniatigut maligassiuisutut aamma nersorneqarpoq kisimiilluni meeqqanik paarsisartuusoq Najaaraq Poulsen.
Najaaqqap meeqqanik sullissaqarnermini ilaatigut pingaartitappai meeqqat paarsani ilagalugit asimut illuaqqannut piliartoqatiginissai. Meeqqat peqatigalugit pingaartittarpai asimi inuunermik misigitissallugit, aamma qangaaniit inuusaasitsinnik inuuinnarnissatsinnut inooriaasitta ilaat imminut pilersorsinnaalernissamut ilinniartillugit, ukiumut inuussutissanik pileqatigalugit.
Qeqqata Kommuniani borgmesterip maligassiuisutut nersornaasiinermini ilaatigut ima oqaaseqarpoq;
- Najaaraq kisimiittuugaluarlutit ukiuni taamak amerlatigisuni meeqqanik taamak amerlatigisunik paarsaqartarsimanerit eqqasaatigalugu nukittoqaatit. Inuiaqatigiinnullu pingaarutilimmik sullisseqataanerit maligassiuisuunerillu pillugu Kommunalbestyrelsep ukiumoortumik innuttaasunut maligassiuisimasunut nersornaasiuttagaa ilinnut tunniunneqassasoq aalajangiunneqarpoq, Malik Berthelsen oqarpoq.
Nersornaasiineq sisamanngornermi decembarip 19-anni kommunip allaffissuani persuarsiornartumik ingerlanneqarpoq.