Maniitsoq
Ulla Dyrløv-ip sapaatip akunnera ulloq ataasinngorneq 20/1 Hotel Maniitsumi Atuarfik kilaaseeqqami ilinniartitsisunut saqqummiilluni aallartippaa. Nammineq piumassuserinngisamik atuarumajunnaarnerup pinaveersaartinnissaa aamma atugarliornerup qanoq takuneqarsinnaanera pillugit saqqummiivoq. Ullup ingerlanerani ilinniartitsisut kajumissuseqarluarput, tamannalu oqallinnernik inuttullu tarrarsornernik kinguneqarpoq.
Unnukkut angajoqqaat innuttaasullu saqqummiivigineqarput. Silap ajornerata timmisartullu uniinnarnerata kinguneraa borgmesteri Maniitsumut innuttaasunut saqqumiiartorluni tikissinnaajunnaarmat. Qujanartumik borgmesterip tullersortaa, Gideon Lyberth aamma sunngiffimmi pisortaq Helge Heilmann, 2024-mut meeqqat atuarfianni atuartunik misissuineq aamma atuarfiit pitsaassusaat pillugu nalunaarut pillugit saqqummiisinnaasimapput.
Taassuma kingorna Ulla Dyrløv innuttaasunut saqqummiivoq. Siullertut atugarliorneq pineqarpoq, angajoqqaallu atugarliornermik pinaveersaartitsinissaq aamma qanoq takunninnissaq pillugit iliuusissaannik siunnersorneqarput. Saqqummiinerni marluusuni apeqqutit ingerlalluaqaat, sinittarneq, pujortartarneq aamma atuanngittarneq pillugit oqallitsitsingaatsiartunik.
Sisimiut
Maniitsumiit Sisimiut tikinneqarpoq, tassani ulloq sisamanngorneq 23/1 Taseralimmi Minngortuunnguup Atuarfiani aamma Nalunnguarfiup Atuarfiani ilinniartitsisunut Ulla Dyrløv saqqummiivoq. Ilinniartitsisunut ualeq atorluarneqarpoq, tassani sulianik ilisimasalittut avitseqatigiinneq aamma inuttut tarrarsorneq periarfissaalluarlutik. Saniatigut atuarfiit marluusuni ilinniartitsisut akimortumik, ilisimasanik avitseqatigiillutik naapinnissartik iluareqaat.
Unnukkut angajoqqaat innuttaasullu meeqqat atuarfianni atuartunik misissuineq aamma atuarfiit pitsaassusaat pillugu nalunaarut pillugit borgmesterimit saqqummiivigineqarput, kingornalu Ulla Dyrløv suliani pillugu saqqummiivoq. Saqqummiinerit kingorna peqataasut borgmesterimut aamma Ulla Dyrløv-imut apeqquteqarsinnaapput. Periarfissarlu atorluarneqarpoq, tamassuma kinguneralugu sinittarneq, atugarliorneq, atuanngittarneq aamma meeqqat inuusuttullu unnukkut aneerpallaartannginnissaat qanoq iliuuseqarfigineqarsinnaanersoq pillugit eqqartuilluartoqarneq.
Qeqqata Kommunia takkuttut tamat tunniusimalluarnerat pillugu qujarusuppoq!
